El BA ataca la reducción presupuestaria española n’Asturies

El Bloque por Asturies vien d’acusar al PSOE de “vender Asturies” por mor de los sos intereses electorales notros llugares del Estáu. Tres la reducción presupuestaria calificó al Gobiernu de “incapaz” pa defender los derechos d’Asturies.

La formación nacionalista, tres la reducción de la inversión p’Asturies nun 40% nos Presupuestos Xenerales del Estáu, volvió a criticar la “falta de respetu y compromisu” pa con Asturies del Gobiernu d’España. Faló de “engaños permanentes”, exemplificándolos nel tema de la eliminación del Peaxe del Güerna, y recalcó la “nula voluntá” p’afitar un calendariu y financiación d’obres d’infraestructures.

“El PSOE ta dispuesto a sacrificar el futuru d’Asturies p’algamar los votos necesarios nel Congresu p’aprobar los sos presupuestos y continuar la so agonía nun Gobiernu fracasáu” criticó’l BA. Tamién argumentó que los intereses electorales tán en Cataluña, Andalucía o’l País Vascu, en cuanta de preocupase por Asturies.

“Complicidá vergoñosa”
A la par, el Bloque por Asturies señaló que’l Gobiernu del Principáu d’Asturies caltién una “intolerable complicidá vergoñosa” pa con Madrid y recordó que’l so Grupu Parllamentariu, al traviés del diputáu Roberto Colunga, presentó una iniciativa na Xunta Xeneral pa que toles fuerces polítiques den una respuesta “conxunta y unitaria a les permanentes agresiones” del Gobiernu Zapatero contra Asturies.