El 92 por cientu de los usuarios d’Asturies.com cree que los Presupuestos Xenerales del Estáu marxinen al país

|

Los Presupuestos Xenerales del Estáu amuesen el desinterés del Gobiernu estatal en solucionar los problemes históricos del país dafechu. Un 92 por cientu de los llectores que participaron en ‘Conceyu Abiertu’ cree que les cuentes marxinen a Asturies.

La entruga plantegada a los usuarios d’Asturies.com foi ‘¿Marxinen los Presupuestos Xenerales del Estáu a Asturies?’, a lo qu’un 92 por cientu respondió que ‘Sí, yá que siguen amosando desinterés n’intentar solucionar les necesidaes históriques dafechu’, por un 8 por cientu que considera que ‘non, porque la cantidá recibida por habitante sigue siendo superior a la media estatal’. A primeros de mes diéronse a conocer les cuentes pa esti 2017, nel qu’Asturies ve reducida la inversión estatal nun 31,33 por cientu, pasando de los 307,66 millones d’euros del 2016 a los 211,25 previstos pa esti añu.

Estes cifres tán mui lloñe de los 1.019 millones d’euros presupuestaos nel 2009, cantidá más alta recibida por Asturies en democracia. Pese a esta mengua progresiva, el desembolsu per cápita de los Presupuestos Xenerales del Estáu p’Asturies sigue siendo mayor que la media estatal (184,66 euros), asitiándose en 202,62 euros.

Dende esti momentu yá ye posible participar nun ‘Conceyu Abiertu’. Nesta ocasión queremos conocer, depués de ver en Selmana Santa ablucantes imáxenes de la Ruta del Cares y d’otros puntos turísticos naturales del país estraos de xente, la opinión de los nuesos usuarios sobre si Asturies ta preparada o non p’acoyer un númberu tan altu de visitantes.

Contador Estadistiques