El 90 por cientu de los llectores d’Asturies.com considera un xenocidiu l’aición d’Israel en Gaza

Gaza vive la segunda xornada d’alto al fueu, pero la buelga de cuatro selmanes d’ataques por parte del exércitu israelín ye contundente. Un 90 por cientu de los usuarios d’Asturies.com considera un xenocidiu l’aición d'Israel.

Los 1.800 muertos en 29 días nel bandu palestín, munchos d’ellos muyeres y neños, son cifres suficientes pa los llectores que participaron nel nuesu ‘Conceyu Abiertu’ pa tachar de xenocidiu les aiciones militares d’Israel nel pequeñu territoriu de Gaza. Asina piensa un 90 por cientu de los nuesos llectores, por un 10 por cientu que ve llexítima la reaición del estáu hebréu, que suma 66 baxes nel conflicutu, de les que 64 son militares. Mentes, naide votó pola opción ‘Nun sé’.

La ‘normalidá’ tornó ayeri na franxa tres la decisión d’Israel de retirar a les sos tropes sobre’l terrén y entamar una tregua de 72 hores. La razón ye la consecución del oxetivu marcáu d’acabar colos 32 túneles de Hamas. Nestos momentos, representantes del Estáu d’Israel y del Palestina tán negociando n’Exiptu pa convertir la tregua en permanente.

Dende esti mesmu momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usuarios sobre la prohibición de les clases de toréu pa neños que taba prevista pal 12 d’agostu na playa de San Llorienzu de Xixón.