El 88% de los ciudadanos desconoz la Constitución Europea

El Conseyu d'Investigaciones Sociolóxiques (CIS) ta acabante d'espublizar una segunda encuesta sobre'l posicionamientu de los ciudadanos énte'l referéndum sobre la Constitución Europea.

Según los datos últimos del CIS, el "Sí" mayoritariu nel referéndum de febreru nun peligra, anque'l tantu por cientu de ciudadanos dimpuestos a votar al favor del tratáu constitucional européu cai del 44'6% que rexistraba la Primera encuesta d'Actitúes y opiniones sobre la Constitución Europea al 42,7% que marca la II encuesta asoleyada pol CIS. Acordies a los datos del Institutu, baxa'l tantu por cientu de los que tienen decidío votar "Sí" y queda allancáu'l númberu de partidarios del "non" nun 4%. Sicasí, xube'l númberu de los que van dir votar el 20 de febreru, pasando del 43,1% al 60,1%, anque esta xuba lleva con ella la de los abstencionistes decidíos, que pasa del 13,6 al 22,6%. El votu en blanco gana puntos tamién, xubiendo del 5,2% al 6,9%

Lo mesmo que nel sondéu d'ochobre, la mayoría absoluta de los ciudadanos manifiéstense como inorantes del conteníu y significáu de la Constitución Europea. el ciudadanu mediu desconoz dafechu'l conteníu y el significáu de la Constitución Europea. Si d'aquella namás el 0,5% de los encuestaos dicíen tener un conocimientu "mui altu" de la Constitución y un 8% un conocimientu "altu, mientres qu'un 40,6% reconocíen tener conocimientu "baxu" el 18,3% "mui baxu" y un 31,9% dicíen directamente que desconocen dafechu la Constitución Europea, nesti sondéu estos porcentaxes tampoco nun cambien, demasiao, y nun lleguen al 1% los ciudadanos que declaren tener un conocimientu "mui altu" del tratáu, mientres que los distintos graos de desconocimientu sumen más d'un 88%, siendo a mes y mediu del referéndum un 24,3% de los ciudadanos los que declaren nun tener conocimientu nengún sobre'l documentu a votar.