El 79 por cientu de los llectores d’Asturies.com cree que l’añu 2013 nun foi bonu pal idioma

|

L’añu 2013 nun foi un bon añu pal asturianu. Ésta ye la opinión del 79 por cientu de los usuarios d’Asturies.com que participaron nel nuesu ‘Conceyu Abiertu’, por un 21 por cientu que piensa que sí hubo avances significativos.

Los datos qu’ufre la investigación 'Valir cultural y educativu de la escolarización de la Llingua Asturiana', fecha por Isabel Hevia, del departamentu de Ciencies de la Educación de la Universidá d'Uviéu por encargu de l'Academia de la Llingua Asturiana (ALLA), podría considerase lo más esperanzador acontecío nel 2013 pa la nuesa llingua. Ésti amuesa un sofitu ampliu de los equipos direutivos de centros públicos de Primaria al enseñu de Llingua Asturiana y Gallego-asturiano –alredor del 90 por cientu ve la escolarización del idioma como un valir cultural y social– y amuesa la bona conocencia que tienen del asturianu: ocho de cada diez xestores saben llingua asturiana y el 66,9 por cientu empléguenla na so vida diaria. Otres noticies destacaes foron la edición per primer vegada del cartelu, tres 77 años, del Descensu Internacional del Seya nel nuesu idioma; la emisión d’un llargumetraxe n’asturianu na TPA, ‘El rostru impenetrable (One-eyed Jacks)’ de Marlon Brando; o la espublización, al mesmu tiempu que’l restu de llingües del mundu, de la aventura última d’Astérix y Obélix, ‘Astérix na Tierra los Pictos’. Pese a estos avances, l’idioma continúa ensin la reconocencia d’oficialidá y sigue marxináu nel sistema educativu.

Dende esti momentu, los nuesos llectores yá pueden votar nun ‘Conceyu Abiertu’ nuevu. Tres la celebración de Fitur, feria de turismu celebrada en Madrid, onde’l nuesu país tuvo un stand destacáu, queremos conocer qué opinen los nuesos usuarios sobre la política de promoción turística del Gobiernu. España ye’l tercer estáu, tres Francia y Estaos Xuníos, que más turistes recibe, pero Asturies nun ye quien a aumentar el númberu de visitantes estranxeros.

 

Contador Estadistiques