El 74 % de la mocedá asturiano vive colos padres

Según los datos más de recién del Observatoriu, el 2004 foi un añu en que'l preciu de la vivienda llibre malpenes cambió, rexistrando un alza del +1,3% anque sobre unos precios mui altos. Nel tercer trimestre del 2004, periodu al que fai referencia l'estudiu, una persona de menos de 35 años tenía qu'acutar el 41,2% del sueldu al pagu de la vivienda, porcentaxe que menguaba al 29,2% en casu de compartir la vivienda ente dos.

L'últimu boletín del Observatoriu Mozu de Vivienda apurre datos que, al paecer del Conseyu de la Mocedá, confirmen les grandes dificultaes que tien la mocedá asturiano p'acceder a una vivienda. Ello ye que'l 74% de la mocedá asturiano sigue viviendo en casa los sos padres y nun son a emancipase. Con too y con ello, los datos del 2004 amuesen una evolución positiva, y ye que mientres el númberu de mozos y moces emancipaos n'España xubió un 0,5%, Asturies presentó una xuba del 9,69%. Sicasí, Asturies presenta una tasa d'emancipación del 26%, la más baxa del estáu y mui lloñe de la media española qu'anda pel 37%

L' Observatoriu Mozu de Vivienda tien esplicación pa estos datos, asitiando la responsabilidá de los mesmos na precariedá llaboral y el desemplegu xuvenil que se dan n'Asturies como causes principales que torguen l'accesu a la vivienda, sobremanera nel casu de les moces. Ello y la propia irregularidá del mercáu de la vivienda lleva a que la edá en que los fíos puen marchar de casa de los padres se retrase cada vegada más, produciéndose un tantu por cientu mayoritariu de les emancipaciones na banda de los 30 a 34 años y en pareya, en cuantes que d'otra manera el coste de la vivienda suel ser inasumible

Pal Conseyu de la Mocedá del Principáu d´Asturies estos datos sorrayen la necesidá de que'l Gobiernu asturianu faiga de les polítiqes públiques de mocedá una "auténtica prioridá na so acción de gobiernu" aldicir de la presidenta del CMPA Rebeca Rodríguez, que declaró que "hai qu'incrementar notablemente los esfuerzos destinaos a combatir la precariedá que carecemos la xente mozo, y tamién combatir los elevaos precios de la vivienda que convierten un derechu fundamental nun suañu inalcanzable" Pal CMPA, el Gobiernu asturianu ta dando pasos nesti sentíu "pero la propia realidá oblíganos a ser más ambiciosos"