El 68 por cientu de los llectores d’Asturies.com cree que’l Gobiernu nun debería pagar a Air Europa

Air Europa dexó d’operar la ruta Asturies-Madrid el sábadu pasáu tres la decisión del Gobiernu de nun renovar el conveniu cola compañía. El 68 por cientu de los nuesos llectores opina que l’Executivu nun debe pagar por mantener esta llinia.
 
Esta situación dexa a Iberia como única aerollinia que conecta l’Aeropuertu d’Asturies col de Barajas, una situación de monopoliu que nun trae bonos recuerdos a los consumidores yá que cuando la compañía trabayaba en solitariu la ruta mantenía los precios más caros de tol norte peninsular. Sicasí, el 68 por cientu de los nuesos usuarios opina que’l Gobiernu nun debería pagar a Air Europa pa qu’opere dende Santiagu’l Monte, por un 26 por cientu que cree que llegar a un alcuerdu cola empresa integrada en Globalia ye’l mal menor pa evitar el monopoliu d’Iberia. Mentes, un 6 por cientu diz nun tener clara cuála ye la postura que debía tomar l’Executivu.
 
De momento, José Manuel Rivero, conseyeru d’Economía, aconceyó en dos ocasiones colos representantes d’Air Europa cola intención de llegar a un alcuerdu, ensin ésitu. Poro, dende agora, y polo menos hasta la temporada de branu –que principia en marzu–, Iberia será la única compañía que faiga la ruta Asturies-Madrid.
 
Dende güei, los nuesos llectores yá pueden votar nun ‘Conceyu Abiertu’ nuevu. Nesta ocasión queremos conocer qué-yos paez a los nuesos usuarios el resultáu eleutoral de Foro de Ciudadanos.