El 64 por cientu de los llectores d’Asturies.com, contrariu a l’aplicación del artículu 155

|

L’aplicación del artículo 155 de la Constitución en Catalunya tres el procesu independentista aniciáu nel país mediterraneu nun convenció a los usuarios d’Asturies.com que participaron nel nuesu ‘Conceyu Abiertu’. Un 64 por cientu refuga esta midida.

“Si una comunidá autónoma nun cumpliere les obligaciones que la Constitución u otres lleis-y impongan, o actuare de forma qu’atente gravemente al interés xeneral d’España, el Gobiernu, previu requerimientu al presidente de la comunidad autónoma y, nel casu de nun ser atendíu, cola aprobación por mayoría absoluta del Senáu, podrá adoptar les midíes necesaries pa obligar a aquélla al cumplimientu forzosu de diches obligaciones o para la proteición del mencionáu interés xeneral”, ye’l testu del artículu 155 que’l Gobiernu del PP punxo en marcha en Catalunya, col sofitu de Foro, el PSOE y Ciudadanos, Coalición Canaria y UPN. Foi’l pasáu 27 d’ochobre en reaición a la declaración d’independencia fecha esi mesmu día nel Parlament y tres requerir un pronunciamientu previu a Carles Puigdemont.

En ‘Conceyu Abiertu’ plantegamos a los nuesos llectores la entruga ‘¿Ta d'alcuerdu cola aplicación del artículu 155 de la Constitución en Catalunya?’, a lo qu’un 64 por cientu opinó que ‘Non’. Mentes, un 36 por cientu decantióse pola opción ‘Sí’.

Dende esti mesmu momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usuarios sobre les centrales térmiques tres l’alderique abiertu sobre’l zarru d’estes instalaciones nel 2020 y la decisión d’Iberdrola de piesllar la de Lada.

Contador Estadistiques