El 63,5% de los xixoneses ta al favor de la oficialidá del asturianu

El sociólogu director del equipu del Euskobarómetro y responsable de los dos Estudios Sociollingüísticos d'Asturies presentó ayeri la Encuesta Sociollingüística de Xixón, la primera que se fai específica pa un conceyu y qu'espubliza agora en forma de llibru la casa Editora del Norte. Al actu asistieron el Director de Política Llingüística Ramón d'Andrés y la Conceyala d'Educación de Xixón Carmen Rúa.

Ente les conclusiones más importantes del estudiu de Llera Ramo, que fexo en coordinación col tamién sociólogu Pablo San Martín y que desarrolló l'equipu del Euskobarómetro, hai ún datu que llama l'atención y ye'l que fai referencia tamién a ún de los aspectos más d'actualidá nel tema de la llingua asturiana como ye'l so reconocimientu como oficial nel estatutu d'autonomía. Según la encuesta, el 63,5% de los xixoneses ta al favor de la declaración d'oficialidá pal asturianu. Existe, con too y con ello, un 22,9% d'encuestaos que refuga dafechu la oficialidá. La encuesta rescampla que tanto los favoratibles como los contrarios a la oficialidá nun concasen con nenguna ideoloxía política concreta, conseñándose en dambos grupos d'opinión la presencia de xente de toles corrientes polítiques. Tampoco hai na encuesta una dixebra ente barrios o parroquies a la hora de definise al favor o en contra de la oficialidá, y, anque evidentemente existen diferencies, en toles zones xeográfiques del conceyu rexístrase una opinión mayoritaria al favor de la oficialidá del asturianu. El nivel d'estudios de los encuestaos tampoco separta bloques d'opinión nesti sentíu.

En cuantes a conocimientu y usu de la llingua, el 82% de los encuestaos aseguren comprender l'asturianu, el 40,5% dicen que lo falen, escriben o lleen, y namás el 17,2% diz que nun ye a entendelo. Nel terrén de la identificación cola llingua, el 52,2% identifícala como la so llingua materna, mientres qu'un 75% tienla, yá seya en solitario o en conxuntu col castellanu, pola llingua propia d'Asturies.

Ún de los aspectos que más se trataron nesta encuesta foi'l del papel que los ciudadanos camienten qu'han tener les instituciones na normalización del asturianu. Yá nel primer adelantu de datos que se diere del estudiu se sorrayó la importancia d'esta parte de la encuesta, na que'l 68% de los entrevistaos pol equipu Euskobarómetro pide una actuación más valiente por parte de les instituciones y un 49% incluso reclamen qu'haya funcionarios capacitaos n'asturianu nel Ayuntamientu. Al 57% prestaría-y sentir a l'alcaldesa y otros representantes públicos falar n'asturianu anque ello namás fuere ocasionalmente, y hai un sentir mayoritariu al favor de que publicaciones como La Gaceta del Ayuntamientu enxerten más artículos n'asturianu. Mayoritaria tamién ye la petición de qu'acontecimientos importantes de la ciudá, casu del Festival de Cine, s'anuncien n'asturianu.