El 53 por cientu de los nuesos llectores prefier el 25 de mayu pa celebrar el Día d'Asturies

Los llectores d’Asturies.com prefieren el 25 de mayu al 8 de setiembre pa celebrar el Día de la Nación Asturiana. El 53 por cientu votó pola primer opción en ‘Conceyu Abiertu’, mientres que’l 40 por cientu fixo lo propio pola segunda.

La declaración de soberanía de la Xunta Xeneral fechada’l 25 de mayu del 1808, rebelándose asina contra les tropes franceses de Napoleón qu’invadieren el país, ye pa’l 53 por cientu de los nuesos usuarios la fecha más afayadiza pa celebrar el Día d’Asturies, que dende’l 1984 conmemórase’l 8 de setiembre, festividá de la Virxe de Cuadonga. Al tener un orixe relixosu, munchos asturianos afirmen nun sentise identificaos col Día de la Santina, anque’l 40 por cientu de los llectores d’Asturies.com opina que debería de caltenese como Día de la Nación Asturiana. Mentes, un 7 por cientu prefier otra fecha a estes dos.

Otra manera, yá se pue votar nun ‘Conceyu Abiertu’ nuevu. Nesta ocasión, queremos saber qué opinen los nuesos llectores sobre si los recortes que ta protagonizando l’Estáu pue llevar al zarru de RTVE. Ayeri conocióse’l zarru –en principio pa trés meses– de la radiotelevisión pública griega, dexando na cai a casi 3.000 trabayadores, dientro de la política d’austeridá que sigue’l Gobiernu helenu.