El 31 d'ochobre xubiráse la Farrapona y el 1 de payares, L'Angliru

La Vuelta celebraráse'l del 20 d'ochobre al 8 de payares tres el reaxuste del calendariu por cuenta la pandemia de COVID-19.

Yá hai feches pa la celebración de les etapes asturianes de la competición ciclista entamada por Unipublic, que finalmente nun va salir de los Países Baxos, como taba previsto, sinón d'Irun, lo qu'obliga a pasar de 21 feches a 18. La primera n'Asturies, un percorríu ente Villaviciosa y L'Altu la Farrapona –undécima de la ronda–, va tener llugar el sábadu 31 d'ochobre, mentes qu'al día siguiente'l pelotón va salir de La Pola Llaviana en direición a L'Angliru, la xornada más esperada de La Vuelta, dos cites nes que pue xugar un factor determinante'l tiempu de la época.

La carrera va pisase col Giro, yá que la prueba italiana tendrá llugar del 3 al 25 d'ochobre. Mentes, el Tour celebraráse del 29 d'agostu al 20 de setiembre, calteniéndose les feches de los LXXXVII Campeonato Mundial de Ciclismo en Ruta, con sede esti añu nos cantones suizos de Vaud y Valais, del 20 al 27 del mesmu mes.

El 1 d'agostu ye la fecha afitada pola Union Cycliste Internationale (UCI) pa la vuelta del ciclismu profesional cola Strade Bianche italiana. Los campeonatos estatales queden programaos del 20 al 23 d'agostu, y los continentales, del 24 al 28.

Na semeya, la mítica Cueña les Cabres na xuba a L'Angliru.