El 2022 va ser l’Añu d’Asturies nel Festival Interceltique de Lorient

Per cuarta vegada nel mediu sieglu del certame, Asturies va ser el país d’honor nel próximu Festival Interceltique de Lorient. La organización confirmó esta mañana les feches, del 5 al 14 d’agostu, y la decisión de dedicar al nuesu país la cincuenta primer edición del mayor eventu mundial al rodiu la cultura celta 9 años depués de tener esti honor.

Llueu de dos años de conversaciones cola Conseyería de Cultura, Política Llingüística y Turismu por parte de Lisardo Lombardía, direutor del certame, y Iñaki Santianes, responsable de la delegación asturiana, el Gobiernu comprómetese a apoyar la presencia d’Asturies como país convidáu. Una oportunidá p’amosar la música, la cultura y la gastronomía asturiana a los miles de visitantes bretones y de tolos territorios de raigañu celta qu’acuden a An Oriant y el meyor escaparate turísticu posible.

“En setiembre vamos a empezar a trabayar col equipu nuevu, ver qué idees nueves tienen pal festival, y a partir d’ehí dir decidiendo grupos y toles cuestiones relatives a la presencia d’Asturies l’añu próximu”, rellata Santianes. Lombardía, llueu de 14 años al frente del Interceltique, abandona’l cargu por xubilación, tomando’l relevu Jean-Philippe Mauras.

El fechu de ser el primer añu como direutor del bretón y la evolución de la pandemia van ser los dos grandes retos del Añu d’Asturies nel festival. Nestos momentos desconozse si la situación nel agostu viniente va asemeyase más a la del 2019 o la del añu actual, anque munches de les midíes adoptaes pa garantizar la seguranza del públicu, músicos y equipu organizativu vienen pa quedar.

La primer vez, nel 1998

Hasta’l momentu Asturies foi convidáu d’honor n’An Oriant en trés ocasiones. La primer vegada que’l nuesu país algamó esti reconocimientu, establecíu nel 1994, foi nel 1998, pa repetir nel 2003 y nel 2013.

Nueve años más tarde la cultura asturiana va tornar a ser protagonista nel Interceltique, tomando’l relevu del país anfitrión, Breizh. Entovía nun se conoz el cartelu nin la tradicional pegadiella conmemorativa de la edición, anque sí les feches que munchos asturianos van acutar nel calendariu pa desplazase a An Oriant: del 5 a 14 d’agostu del 2022.

Na semeya superior, ambiente de cai nesta edición del Festival Interceltique de Lorient. Na inferior, Jean-Philippe Mauras, direutor nuevu; Santianes; Lombardía; y Jean Peeters, presidente del certame, esta mañana.