El 10 por cientu de la población yá tien la pauta completa de la vacuna

|
Gráficu vacunación pauta completa 5 d'abril del 2021

Asturies ye'l primer territoriu del Estáu en ritmu de vacunación. El llunes detectáronse 96 casos nuevos de COVID-19, con una tasa de positividá diaria del 4,27 por cientu.

Un 10,3 por cientu de les asturianes y asturianos yá tienen la pauta completa, según l'informe de vacunación facilitáu pol Ministeriu de Sanidá ayeri con datos aportaos pola Conseyería de Salú. Supón un total de 92.794 persones, mentes que 157.338 cuenten colo polo menos una dosis, un 17,5 por cientu de los 901.209 a vacunar según l'Instituto Nacional de Estadística (INE).

Namái algama la cantidá d'un 10 por cientu en pauta completa Castilla y Lleón, con un 10 por cientu xustu, mentes que Cantabria ta nun 8,9 por cientu. Les autonomíes con porcentaxes más baxos son Melilla, con un 3,7 por cientu; Illes Balears, con un 5 por cientu; Ceuta, con un 5,5 por cientu; y Euskadi, con un 5,6 por cientu, asitiándose la media estatal nel 7,1 por cientu.

Dos finaos

A falta de la espublización de los datos oficiales de la COVID-19, la Conseyería de Salú comunicó ayeri 96 contaxos, 1 más que'l domingu. La tasa de positividá diaria foi del 4,27 por cientu tres la realización de 3.039 pruebes de diagnósticu d'infeición activa pol 5,23 de la xornada anterior, mentes qu'a 7 díes na actualización última esti porcentaxe taba nun 5,78 por cientu –ayeri baxó al 5,60 por cientu–.

Hai que llamenta la muerte d'una muyer de 89 años y un home de 85. Dende qu'entamó l'andanciu finaron 1.907 persones cola enfermedá causada pol coronavirus SARS-CoV-2.

Tán hospitalizaos 188 pacientes con confirmación o sospecha de COVID-19, a los qu'hai que sumar 68 ingresaos na UCI. Son 4 y 2 más que'l domingu, de manera respeutiva.

Séptima prórroga

La Conseyería de Salú espublizó la resolución pola que se prorroguen 14 díes más les midíes pa facer frente a la situación sanitaria, hasta'l 19 d'abril. Sicasí, hasta'l vienres van tar vixentes les restricciones especiales pola Selmana Santa.

Na imaxe, gráficu espublizáu pola Conseyería de Salú col porcentaxe por autonomíes cola pauta completa de la vacuna de COVID-19.

Contador Estadistiques