El ‘single’ nuevu de Músicos pola Oficialidá y la XPDLLA va asoleyase namái n’Internet

|

Esti llunes presentóse n’Uviéu’l XXIII Conciertu pola Oficialidá, que va celebrase’l 16 d’abril cola participación d’ocho bandes. Pa esa fecha tamién va asoleyase un cantar nuevu de Músicos pola Oficialidá, ‘single’ que nun va tener formatu físicu.
 
Carlos Pulgar, voceru de la Xunta Pola Defensa de la Llingua Asturiana (XPDLLA) dio esta anuncia nun actu celebráu nel Llar Solidariu y nel que tamién tuvieron presentes Miguel Montevaro, de Xunta Moza, y  Santi Caleya y Merce Santos, de La Bandina, como representantes de los músicos participantes nel conciertu. “El formatu CD empieza a nun ser estrictamente necesariu y vamos a probar esta tendencia nueva de colgar los ‘singles’ nes ‘webs’”, esplicó Pulgar, que nun descarta nun futuru editar un discu con tolos cantares que se vayan sacando. La intención de la XPDLLA ye que’l d’esti añu tea colgáu na web del coleutivu pa la fecha del conciertu.
 
Blima, Toli Morilla, Llangres, La Bandina, Misiva, K-Nalón, La Tarrancha y La Coḷḷa Propinde son los grupos que van participar na Feria de Muestres de Xixón nun “de los actos más importantes dientro del panorama sociocultural asturianu”, aseguró Monteavaro. Esta edición del Conciertu pola Oficialidá va contar con “ocho hores iinterrumpíes de música en directo gracies a la presencia de dos escenarios, que van alternar l’orde de los grupos”, continuó’l representante de Xunta Moza, que nun quinxo dexar d’agradecer el “trabayu desinteresáu de músicos y organizadores”.
 
Santi Caleya, na so intervención, señaló que “los músicos tamos cola cultura y la llingua asturiana” y criticó la situación na que s’atopa l’asturianu. “Tán dexando morrer la nuesa cultura ensin nengún tipu de quebraderu de cabeza. Areces, dende que ta nel Gobiernu, nunca dixo una pallabra n’asturianu y, como él, Letizia y otros personaxes públicos asturianos, elexíos o non polos asturianos”, continuó Caleya. Mentes, Santos destacó’l trabayu “que vien faciendo la Xunta en defensa de la llingua dende hai muchos años” y apuntó que “La Bandina nun se pue negar a collaborar nesti conciertu y poner el nuesu granín d’arena” na llucha pola reconocencia de la oficialidá del asturianu.
 
“Dende la Xunta Pola Defensa de la Llingua Asturiana, como tolos años, naguamos por qu’esti seya l’últimu añu que tengamos qu’organizar esti conciertu reivindicatiu y que pal añu que vien podamos celebrar, por fin, el primer Conciertu de la Oficialidá de la Llingua Asturiana”, añadió Monteavaro, qu’aseguró que dende’l coleutivu van siguir trabayando pa que “el Gobiernu asturianu sienta les voces que dende la comunidá internacional tán llamando a adoptar midíes urxentes pa invertir esta situación de perda idiomática. Dende la Xunta nun se pue otro que llamenta la escepcionalidá de la situación del patrimonio llingüísticu asturianu y la sordera institucional que sufre l’acomadada clas política asturiana”.
 
El XXIII Conciertu pola Oficialidá va principiar a les 19 hores na Feria de Muestres de Xixón. La XPDLLA sacó a la venta 3.500 entraes pal conciertu a un preciu de 8 euros, anticipada, y de 10, na puerta, que yá tán disponibles en La Casa Posafuelles y Malayerba nunca muere, n’Uviéu; Café Trisquel y El Barucu, en Xixón; El Cafetón, n’Avilés; La Gueta, en Candás; Mesón Cervantes, en Tinéu; Bar Azul, en Cangas; Café Centro, en La Puela; L’Abellugu, en Mieres; La Palmera, en La Pola Ḷḷena; Abre César, en La Pola Siero; Bar Piero’s, en Grau; Bar Maybe, en L’Infiestu; y Tom Mallory, en L’Entregu.

Contador Estadistiques