EEUU y España van roblar un alcuerdu pal usu militar d'El Musel

L'ampliación del Puertu del Musel va sirvir como segunda base de la II Flota de l'Armada de los EEUU, según un alcuerdu conxuntu acabante de facer públicu polos Ministerios de Defensa y Esteriores y nel que tamién participaron les autoridaes del Gobiernu asturianu, principal interesáu n'atraer p'Asturies la presencia de la flota americana, qu'incluye seis destructores, cuatro fragates, dos barcos d'aprovisionamientu y un submarín". Toos estos barcos van tener por base n'Europa'l Puertu de El Musel en Xixón, que va convertise nun de los noyos d'operaciones del exércitu americanu pal Atlánticu Norte y Canal de la Mancha.

La II Flota de la marina americana tien por base'l puertu de Norfolk (Virginia), pero l'estáu mayor americanu precisaba d'una segunda base d'operaciones n'Europa. La esistencia del proyectu del superpuertu de El Musel, agora acabante concretase cola llegada de fondos europeos, animó a les autoridaes de los EEUU a falar col gobiernu del presidente Zapatero sobre un posible tratu pal aprovechamientu de les sos instalaciones por parte de la US Navy. Pela so parte, el nuevu executivu de Zapatero, que buscaba un averamientu cola primer potencia mundial, vio nello la oportunidá d'aselar les tenses rellaciones colos EEUU, ofreciéndose dende un principiu a la propuesta americana. Sicasí, sábese qu'el ministru de defensa José Bono nun vía bien la ufierta americana, qu'interpretó como una amenaza a la soberanía española, pero'l proyectu tuvo una mui bona acoyida nel Gobiernu asturianu. El presidente Areces convertióse asina nel primer defensor del proyectu, nel que l'executivu asturianu ve la posibilidá d'atropar tráficos pal nuevu Musel ampliáu y amás garantizar el desarrollu del sector servicios asturianu, que se beneficiaría de la presencia de más de los de 35.000 marineros y oficiales, toos ellos con un altu poder alquisitivu, qu'igüen la tripulación de la flota, según fontes de Presidencia.

Los EEUU yá llevaben tiempu tres d'una base europea pa la II Flota que patrulla nel atlánticu. Yá a primeros d'esti añu, el National Trust for Defence (NTD), ún de los "Think Tanks" más influyentes de los EEUU xunta'l CATO Institute, espublizó un volume especial sobre asuntos de defensa europeos nel que falaba de la necesidá d'esta base nel continente énte la perspectiva d'una Europa desestabilizada a mediu plazu na que los EEUU precisaríen d'una fuerza d'acción rápida con capacidá pa defender la Canal de la Mancha y l'Atlánticu Norte. Nel so analís, que reproducimos en formatu PDF, el National Trust for Defence yá falaba del potencial del Puertu de Xixón como posible allugamientu pa la II Flota, emponderando les virtúes del nuevu Musel ampliáu como base militar y de la ciudá de Xixón como llugar acoyedor y d'espardimientu pa la tropa.

L'alcuerdu pal usu del puertu de Xixón por parte de los EEUU ta namás pendiente d'un actu de firma solemne que va facese pa primeros del añu qu'entra. Hasta onde pudo saber esti mediu, ente los términos del alcuerdu ta'l que barcos de la Armada Española usen tamién les instalaciones de la base de El Musel y una ayuda financiera de los EEUU na construcción de los diques y instalaciones especiales que se precisaríen, abriéndose pa ello una nueva contrata a la que seguramente se presentaríen tamién empreses americanes.