EE.UU debe 1.200 millones de dólares a la ONU

Estados Uníos debe 1.200 millones de dólares a Naciones Uníes, más d'una cuarta parte del total de la deuda de tolos Estaos miembros cola organización, según informó la secretaria xeneral adxunta de xestión de la ONU, Angela Kane.

Kane indicó a un grupu de periodistes que namás 13 de los 192 Estaos miembros de la ONU teníen les sos cuentes saldaes cola organización hasta esti miércoles. El total a deber suma unos 4.100 millones de dólares, frente a los 2.200 millones que se debíen a finales del 2009, dixo Kane. "Foi un añu difícil por dellos motivos pa munchos Estaos miembros pola recesión económica", esplicó.
  
Sicasí, el Gobiernu encabezáu pol presidente Barack Obama aseguró que yá pagó tol dineru qu'Estaos Uníos debía a Naciones Uníes l'añu pasáu. La embaxadora estadounidense, Susan Rice, indicó'l xueves a los periodistes que Washington pagó les sos obligaciones cola ONU "dafechu y a tiempu".
  
Coles mesmes, precisó qu'ente esos 1.200 millones de xuru s'incluyeren les llamaes "deudes refutaes", unes cantidaes qu'Estaos Uníos nun reconoció como deudes a la ONU.
  
Reticencies a pagar
Estados Uníos ye'l mayor contribuyente de Naciones Uníes y ye responsable de casi una cuarta parte del total del presupuestu de les fuerces de paz de la ONU, asina como de poco menos d'una cuarta parte del presupuestu regular de la organización. Washington yá mostró nel pasáu les sos reticencies a pagar les sos obligaciones cola ONU, coles consiguientes crítiques de la organización.
  
N'avientu del 2009, l'Asamblea Xeneral de la ONU aprobó un presupuestu de 5.160 millones de dólares pal periodu del 2010 y 2011. Esa cifra nun inclúi les fuerces de paz, que representen unos 8.000 millones de dólares añales y apruébense en forma separada, o'l costu de delles axencies de la ONU que tienen presupuestos estremaos.