Día del Llibru Asturianu

Educación retrasa l’entamu del cursu hasta’l 22 de setiembre pa garantizar la presencialidá

|
Juan Cofiño, Melania Álvarez y Carmen Suárez vuelta a la escuela

El cursu 2020-2021, marcáu pola crisis sanitaria pola pandemia de COVID-19, va echar a andar finalmente’l 22 de setiembre n’Infantil y Primaria. La Conseyería d’Educación decidió retrasar una selmana’l so entamu en toles etapes educatives pa facer PCR a tolos maestros, y anunció la contratación de 860 profesores más.

“Queremos facer les coses bien. N’Asturies creo que tamos faciéndoles bien y queremos siguir nesa llinia y inclusive ameyorala”, apuntó la conseyera Carmen Suárez Suárez tres l’aconceyamientu del Conseyu de Gobiernu d’esta mañana un día depués del alcuerdu de 23 midíes y 5 recomendaciones ente les autonomíes y el Gobiernu estatal pa la vuelta a la escuela con seguridá. A partir d’elles l’Executivu asturianu tomó delles decisiones, como’l retrasu del entamu del cursu o l’afitamientu definitivu de les ratios.

“Tola Educación Infantil, tola Primaria y los dos primeros cursos de la Educación Secundaria van tener grupos de 20 alumnos y alumnes”, confirmó la conseyera, con clases siempre presenciales. Los siguientes cursos, con grupos de 25 o 30 escolinos, van contar mentes con clases semipresenciales –en zones rurales, con menos de 20 alumnos por aula, va ser presencial–, “esto ye qu’unos díes va tar la metá del cursu y la otra metá va tar el día siguiente”.

Pa poder afrontar esti panorama, el Gobiernu va facer una dotación teunolóxica “pa que se pueda compartir la situación del alumnáu nes sos cases y nel aula”. La intención de que les clases sían presenciales va llevar a la realización de pruebes PCR pa tol profesoráu, midida que “va condicionanos pa retrasar unos díes l’empiezu del cursu, porque entendemos que la llegada del profesoráu ha de ser coles garantíes totales de salú”, apuntó Suárez.

Asina, el 22 de setiembre va ser la fecha d’entamu de les clases n’Infantil y Primaria –nun primer momentu taba previsto pal día 10–; el 28 en Secundaria; el 29, en Bachilleratu; y el 30, en Formación Profesional. Pal restu d’enseñances caltiénse’l 5 d’ochobre.

Otra manera, el Gobiernu va contratar 860 profesores más p’afrontar la situación.

Na semeya, Juan Cofiño, vicepresidente y conseyeru d'Alministración Autonómica, Mediu Ambiente y Cambiu Climáticu; Melania Álvarez García, vocera del Gobiernu y conseyera de Derechos Sociales y Bienestar; y Suárez.

Contador Estadistiques