Educación quier avanzar nel programa d'enseñanza de 0 a 3 años

El conseyeru d'Educación y Ciencia, José Luis Iglesias Riopedre, manifestó güei qu'espera que col reestablecimientu de la presidencia de la Federación Asturiana de Conceyos, FACC, puedan entamar de nueves lo más pronto posible les negociaciones pa consensuar un nuevu conveniu que regule la rede educativa de 0 a 3 años, y qu'esclarie la titularidá de dichos centros, que nestos momentos "y de manera provisional, nun apaez nos convenios firmaos".

Riopedre recordó, énte les entrugues del PP y Izquierda Xunida-Bloque por Asturies-Los Verdes, que les escueles infantiles ríxense nesti momentu pol conveniu firmáu nel 2002 ente la FACC y los sindicatos, un conveniu "que sigue funcionando y naide punxo en cuestión", y añadió que ta ellaborándose un proyectu de Llei que va tener un reglamentu y una memoria económica. Insistió amás en que'l tema personal ye únicu y de dalgún Conceyu concretu.

Riopedre compareció na Xunta Xeneral del Principáu por pidimientu del grupu parlamentariu del PP pa esplicar la situación actual de la Rede educativa de 0 a 3 y respondía d'esti mou a les crítiques de los 'populares'.

El responsable d'educación manifestó que la titularidá de los conceyos de les Escueles Públiques nun ye dalgo característico d'Asturies, sinón tamién del restu de les comunidaes y que quien matricula a los neños ye'l propiu conceyu.

Pela so parte, el diputáu del grupu parlamentariu del PP, Emilio Rodríguez, llamentó que'l conseyeru "siga cayendo nel error" col so plantegamientu sobre la situación d'esta etapa educativa. Asina, entrugó por qué conveniu se rixen les escueles infantiles nesti momentu y los motivos polos que nun s'algamó firmar un nuevu conveniu colos conceyos.

"Van llevar a los conceyos a una cai ensin salida y dalgún ta ya al borde de la irregularidá, porque falamos d'abondos profesionales que nun saben si son dependientes del Conceyu o de la Conseyería", dixo Rodríguez, qu'acusó al Principáu de pretender treslladar a los Ayuntamientos la responsabilidá de la escolarización de 0 a 3.

Na mesma llinia, manifestóse'l diputáu d'IX-BA-LV, Francisco Javier García Valledor, que calificó de "estravagante" el modelu educativu creáu y insistió n'entrugar pola situación llaboral de los trabayadores de les escueles de 0 a 3. Pidió al conseyeru qu'esclarie si se trata de trabayadores municipales o non. Riopedre afirmó que "son trabayadores municipales pero non regulaos pol conceyu sinón por un conveniu específicu".

Valledor incidió amás en que nun hai de dixebrar esa etapa educativa del restu polo que van pidir que'l proyectu de Llei recueya la titularidá del Principáu d'Asturies, pa que los profesionales seyan dependientes del Principáu y que la ufierta seya universal. Asina, consideró "escasa" la previsión del Gobiernu rexonal de llegar al 34 por cientu de la escolarización de neños del 0 a 3. "Naguamos con interés pol cumplimientu de la resolución aprobada nel Plenu al respecto", finó Valledor.

Riopedre aseguró amás que ya tán avanzando les negociaciones cola Conseyería de Bienestar Social pa que los cuatro centros dependientes de dicha Conseyería pasen a formar parte de la d'Educación y Ciencies. "Espero que nesti cursu esi asuntu tea resueltu", dixo Riopedre.

El conseyeru d'Educación y Ciencia esplicó na Xunta que'l 25 por cientu de la población asturiana menor de tres años ta ya escolarizada, el 64 por cientu ta en centros públicos y el 36 por cientu en privaos, y aseguró que l'oxetivu marcáu pol Principáu ye llegar al 34 por cientu de la ufierta pal final d'esta llexislatura y llegar a les 66 escueles.

Riopedre incidió en que'l gran retu de la educación de 0 a 3 nun ye tanto la financiación, sinón "llograr ofrecer una calidá educativa que faiga que los pas confíen nella" y recordó que'l 0-3 forma parte d'una etapa escolar que nun ye nin obligatoria, nin de baldre. Destacó que nel Principáu esti tramu educativu "ta enforma sovencionáu".

Nesti sentíu, manifestó que'l coste mediu por plaza ye de 454 euros, y como máximu les families paguen el 50 por cientu del coste total de la plaza. Asina, el pagu mediu que realicen los pas asturianos ye de 130 euros y reciben una sovención media de 415 euros mensuales. El 25 por cientu del alumnáu ta lliberáu d'esti pagu y el 80 por cientu recibe dalgún tipu de bonificación.

Insistió amás en que'l modelu d'educación de 0-3 desarrolláu n'Asturies respuende a un plantegamientu que busca la "más alta calidá del serviciu, axeitáu a les necesidaes de la población, y ta integráu nel sistema educativu públicu".

Destacó que se firmaron 28 convenios con dambos conceyos asturianos que permitieron abrir 36 escueles públiques, a les qu'hai que sumar ocho centros calteníos con fondos públicos.