Educación quier aumentar les xornaes completes a profesores d'asturianu

El Gobiernu presenta un plan pa reducir les medies xornaes docentes al rodiu del 50 por cientu pal cursu viniente, del 76 por cientu nel casu de los profesores d'asturianu. Asina quier facelo la conseyería.

L’actuación concreta plantegada consiste en combinar places asitiaes a menos de 15 quilómetros de distancia dientro del mesmu conceyu o limítrofes pa consiguir un horariu completu de calter itinerante. Nel casu de los profesores de Llingua Asturiana y Gallego-asturiano crearíense 60 xornaes completes y quedaríen 36 profesionales con media.

En total la pretensión ye reducir les medies xornaes cerca d'un 50 por cientu, lo que nel casu de les llingües propies aumentaría un 76 por cientu. El estudiu fechu pola Direición Xeneral de Personal Docente, entregáu esta mañaya a la Xunta de Personal Docente, señala que na primera convocatoria d’interinidá del cursu actual salieron un total de 1.136 places a media xornada, esto ye, con 10 hores llectives selmanales en Secundaria y 12 en Primaria.

Dientro d’esas 1.136 places hai delles que pol so propiu perfil nun pueden ser modificaes: les que yá son itinerantes de por sí; les que surden de la reducción horaria de los cargos direutivos; les que tán asignaes a un programa concretu, como por exemplu’l PROA+ o diversificación curricular; lliberaciones sindicales; o dalgunes que son úniques, les que nun esiste más qu’una en tol sistema. Quedaríen entos 726 susceptibles de ser combinaes.

D’elles, siguiendo’l plan d’horarios completos xuntando places nun radiu de 15 quilómetros, podría actuase en 400, polo que se xeneraríen 200. Esto supón una mengua del 55 por cientu en conxuntu.

Organización d’horarios pa nun dir a dos centros nun día

El direutor xeneral César González Prieto precisó a les organizaciones sindicales que l’análisis se fixo sobre les places convocaes nel primer llamamientu d’interinos del cursu pasáu, polo que los númberos nun tienen que reproducise con exautitú nel cursu vinientu. Ye, poro, una “aproximación lo más exauta que podíamos facer”.

Educación comunicó tamién que se van incluyir una serie d’acotaciones na próxima circular d’entamu de cursu nel que va recordar a escueles o institutos que los itinerantes nun pueden ser tutores. Tamién se va recomendar a les direiciones qu’organicen los horarios de tal manera qu’intenten qu’un profesor nun tenga que dir nun mesmu día a dos centros diferentes.

Na semeya, Lydia Espina conversa na cai con miembros de la Xunta de Personal Docente.