Educación presenta un programa pa enseñá-yos llingua y cultura asturianes a adultos

La Conseyería d'Educación y Ciencia presentó esti vienres el primer programa pa la enseñanza de persones adultes en llingua y cultura asturianes. El coordinador de llingua de la Conseyería, Fernando Padilla, y los responsables del programa, Antonio Reguera y Paz Fonticiella, presentaron un testu que quier "desarrollar, recuperar y caltener los niveles de competencia comunicativa del alumnáu d'enseñanza adulta".



Respondiendo a lo qu'apuntaben los últimos estudios sociollingüísticos ellaboraos por Francisco Llera Ramo, que sorrayaben la importancia de potenciar la educación d'adultos pa meyorar la tresmisión xeneracional del asturianu, el llibru presentáu esti vienres articúlase en seis estayes que traten cuestiones de llingua oral, llingua escrita, ortografía y gramática, lliteratura, cultura y sociollingüística. Fernando Padilla esplicó como'l llibru nun pretende ser una programación d'aula, sinon un marcu de referencia, flexible y estructuráu pa persones adultes". Los autores del programa declararon que l'oxetivu del so trabayu ye que los adultos qu'estudien esta materia s'afayen cola enseñanza y vean resultaos" valiendo'l llibru como guía pa que los profesores puean adaptase a les característiques de cada grupu d'alumnos.