Educación xube la ufierta de places a 117

Sigue la negociación ente los sindicatos d'enseñanza y la Conseyería d'Educación p'apautar la ufierta de places que van salir a oposición nesti añu 2006. Respective a la primer ufierta, el númberu total de places cuasimente nun varía, pasando de 110 a 117.

Si'l primer borrador col que trabayaba la Conseyería d'Educación proponía n'educación secundaria 5 places n'Intervención Sociocomunitaria, Formación y Orientación Llaboral, Tecnoloxía, Educación Física, Música, Inglés, Francés, Matemátiques, Historia y Filosofía, 6 places pa Sicoloxía, 7 pa Llingua Castellana y Lliteratura y 8 pa la especialidá de Dibuxu, la ufierta nueva dexa otra vuelta 5 places pa Filosofía, Educación Física, Música y Matemátiques, mientrs que pasen a tener 6 places Historia, Intervención Sociocomunitaria, Formación y Orientación Llaboral y Tecnoloxía. Sicoloxía pasa a tener siete, mientres que dibuxu quedaría con 8. Llingua Castellana y Lliteratura ye la que más ufierta pasa a tener, xubiendo d'ocho places a once.

Pal cuerpu docente de Formación Profesional, la conseyería que dirixe Iglesias Riopedre propón agora 2 places de Peluquería, 8 de Servicios a la Comunidá (5 na primer ufierta) y 8 de Caltenimientu de Vehículos (que de mano yeren 6). Nel casu de les Escueles d'Idiomes la ufierta ye de trés places pa poner clas d'Alemán, y nel de Música y Artes Escéniques pidiríense 3 d'Interpretación y 5 de Pianu, desapaeciendo los 2 profesores de Guitarra que s'ufiertaben de mano. No tocante a Artes Plástiques y Diseñu sigue cola mesma ufierta, con 2 places de Medios Informáticos, otres 2 de Dibuxu Artísticu y Color y 3 de Conservación y Restauración d'Obres Pictóriques.