Educación quier potenciar l’enseñu del gallego-asturianu

Con motivu de la celebración ayeri en A Veiga del "Día das Letras en Gallego-Asturiano" que llegaba a la so VI edición, el responsable de temes de llingua na Conseyería d'Educación Fernando Padilla esplicó que'l so departamentu ta trabayando na creación d'un grupu de trabayu col oxetivu de facer de manuales d'enseñanza pa los cuatro niveles de secundaria de gallego-asturianu.

Estos manuales son un preséu básicu p'ameyorar les condiciones en que se pon esta asignatura na que tan matriculaos 275 escolinos de primaria sobre un total de 1153 y otros 224 estudiantes de secundaria sobre un total de 1153, unos númberos qu'espeyen una xuba de matriculación dende va unos años p'acá pero que de cualquier manera tan a muncha distancia de los índices de matriculación que tien l'asignatura de llingua asturiana, y ello ye que mientres la fala namás s'imparte en 7 de les 16 escueles esistentes y namás la estudien el 23,8% de los escolinos del Navia-Eo, l'asturianu en primaria algama tases de matriculación de más del 50%. En secundaria la ufierta de gallego-asturianu ta presente en 5 de los 6 IES del Navia-Eo, lo que fai que'l gallego-asturianu presente un 18% de matriculación, un tantu por cientu asemeyáu al del asturianu.