Educación aumenta n’otres nueve places la reducción de docentes pal cursu próximu hasta llegar a les 297

La Conseyería d’Educación comunicó esti martes a la Xunta de Personal Docente Non Universitariu que’l númberu total de places docentes que va reducir ye de 297. Ello supón un aumentu de 9 places respeuto a les previsiones anteriores.
 
Les protestes de la Xunta de Personal Docente Non Univesitariu –órganu que representa a tolos sindicatos educativos– y la situación complicada que van vivir zones como’l suroccidente asturianu pola falta de personal, nun son impedimentu pa que la conseyería xuba a 297 el númberu de places docentes que va reducir pal cursu próximu. Esta mañana, nuna reunión informativa convocada por Educación, comunicó la so decisión final a la Xunta de Personal: a les 288 places que se manexaben ayeri, se sumen agora nueve más. Unes cifres que’l Gobiernu da por zarraes.
 
Esta xuba “nun se debe a razones oxetives”, señala José Antonio Alonso, delegáu de la Xunta de Personal por Suatea, sinón que “respuende a razones de númberos”. O lo que ye lo mesmo, al axuste presupuestariu de l’Alministración, lo que pa los sindicatos supón “un esmantelamientu de la educación pública asturiana” porque dexa a los centros escolares mui lloñe de les sos necesidaes reales. Ente les consecuencies d’estos recortes, Alonso señala “la reducción que va sufir l’atención a la diversidá” como “la más grave”, yá que va impedir atender al alumnu que más lo necesite como se debería.
 
La Xunta de Personal venía de celebrar ayeri un conceyu estraordinariu en Cangas del Narcea, llugar escoyíu por ser una de les zones que, poles sos carauterístiques, más va sufrir los recortes d’Educación: ye onde más Centros Rurales Agrupaos hai y tien una tasa d’interinos mui alta, que va agravase l’añu próximu. Nél, tres participar nel paru de 10 minutos que los profesores del institutu de Cangas y de tolos centros del país fixeron en mou de prostesta, los delegaos estudiaron la situación y planificaron les movilizaciones que van desarrollar contra la decisión de l’Alministración. Mañana, miércoles, va celebrase la primer d’elles, a les 18 hores, frente a la conseyería, y el llunes próximu ta convocáu otru conceyu estraordinariu n’Avilés que va dir acompañáu d'un paru nuevu de diez minutos a la hora del recréu en tolos centros del país.
 
Otra manera, el Sindicatu d’Estudiantes tien convocada tamién pa esti miércoles una xornada de protesta en defensa de la enseñanza pública. A les 12 hores ta prevista una manifestación na plaza l’Institutu de Xixón, conocida como la del Parchís, y otra, a la mesma hora, frente a la Xunta Xeneral, n’Uviéu.