Educación abre’l plazu pa la presentación de solicitúes de centru escolar pal cursu próximu

Esti martes va abrise’l plazu pa presentar les solicitúes d’almisión nos centros escolares pal alumnáu d’ingresu nuevu. Los pas tienen hasta’l 6 de mayu pa pidir colexu pa los sos fíos o pa camudar de centru de cara’l cursu próximu.
 
El primer pasu qu’han de facer los pas ye acudir al centru escolar escoyíu como primer opción pa entregar la solicitú. El documentu pue recoyese na secretaría de los propios centros, onde tamién van recibir información sobre la documentación adicional que deben presentar, o descargase per Interner nesti enllaz. El 13 de mayu, cada colexu va presentar una llista colos alumnos almitíos de forma previa. Tres un periodu abiertu pa reclamaciones, el 24 de mayu espublizaránse les llistes definitives. La formalización de la matrícula pa Infantil y Primaria ha de facese ente’l 13 y el 24 de xunu.
 
Los criterios que s’establecen pa l’admisión d’alumnáu pal centru son, nesti orde, la permanencia d’hermanos nél o que dalgún de los dos pas o de los tutores llegales sían trabayadores del colexu; la proximidá del domicilu familiar o del centru de trabayu de los pas o tutores; les rentes anuales de la unidá familiar; y la discapacidá del alumnu o de dalgunos de los pas o hermanos. Los empates na puntuación total del baremu d’almisión van resolvese atendiendo al resultáu del sortéu celebráu na Conseyería d’Educación y Ciencia’l 15 de marzu pasáu; esto ye, les dos primeres lletres del primer apellíu (CB) nel sentíu de la ordenación alfabética de Z a la A.