EDP podría facese cola mayoría n'Hidrocantábrico

Según se ruxeper dellos confidenciales d'Internet l'alcuerdu del Mercáu Ibéricu d'Electricidá ente Madrid y Lisboa pue tener consecuencies perimportantes pa la compañía eléctrica d'aniciu asturianu Hidrocantábrico. El casu ye que según estes informaciones yá ta falándose d'un cambiu estratéxicu de cromos ente Madrid y Lisboa pol que Telefónica desembarcaría con fuercia en Portugal, onde anguaño tien esclusividá Portugal Telecom mentanto que la portuguesa EDP tendría via llibre pa fusionar Unión Fenosa y Hidrocantábrico algamando una posición de privilexu na Península Ibérica. EDP tien anguaño'l 40% del capital social de l'asturiana Hidrocantábrico y nos últimos tiempos la compañía eléctrica portuguesa foi ganando puntos nel Ministeriu d'Economía del Estáu Español lo que la llevó a tener reconocíos los sos derechos de votu en HC y a entamar a enanchar la so presencia nel accionariáu. La estratexa taría materializándose yá tres de l'anuncia del presidente d'EDP Joao Talone de l'alianza pa repartir HC con Caxastur a la par que ponía bien d'interés n'Unión Fenosa.

El tercer sociu en discordia dientro d'esti temblíu accionarial ye l'alemana EnBW, que tien anguaño'l 35% de los títulos d'HC. El diariu alemán "Die Welt" dio anuncia ayeri de que la eléctrica teutona, convidáu de piedra a tolo que ta amagostándose na península, podría vendé-y a EDP la so participación na eléctrica asturiana, que val anguaño cerca de 1.000 millones d'euros.