Ediciones Trabe donó-yos 7500 llibros a les biblioteques asturianes

La casa editorial Ediciones Trabe, dientro de la so política de d'espardimientu de la lliteratura asturiana y del so enfotu por allegá-yos la llingua asturiana a los sos llectores potenciales, dio anuncia esta mañana de la donación desinteresada por parte de la editorial a la Rede de Biblioteques d'Asturies de más de siete mil quinientos exemplares de 68 títulos distintos del so catálogu editorial, que se terminaron de distribuyir a les biblioteques a lo llargo d'esti añu 2005.

Los más de los títulos donaos corruespuenden a les colecciones de narrativa de la editorial, anque tamién hai dello d'ensayu, poesía o cómic. La editorial que dirixe Antón García plantegóse'l facer esta donación partiendo del presupuestu de que la lliteratura n'asturianu ha tener una mayor presencia nes biblioteques d'Asturies, ello al empar que con esti xestu Ediciones Trabe quier aprovechar pa manifestar la so refuga a que se lleve a efectu la directiva europea de "pagu por préstamu" que se conoz popularmente por "canon" y reclamá-yos tamién a les autoridaes asturianes una mayor atención y dotación económica pa la merca de llibros asturianos que tean escritos en cualquiera de les llingües d'Asturies.