Ecoloxistes y vecinos afeutaos protestaron n'El Remediu contra les llinies d’alta tensión

|

Unes 400 persones, según los datos facilitaos polos convocantes, celebraron n’El Remediu’l Día Mundial del Mediu Ambiente (5 de xunu) con un actu-protesta. Esti pueblu navetu ye ún de les más afeutaos del país poles llinies d’alta tensión.
 
Per El Remediu pasen hasta trés llinies d’alta tensión y nél ta previsto que se faiga l’entronque de la ‘Costa Verde’. Por esti motivu, coleutivos ecoloxistes y asociaciones vecinales decidieron celebrar ayeri nél el Día Mundial del Mediu Ambientu. L’actividá principió alredor de les 12.30 hores nel Campu la Ilesia con una esplicación de l’Asociación de Vecinos d’El Remediu sobre lo que diba ser la xornada pa, darréu, entamar un percorríu pol pueblu d’una hora de duración pa conocer ú tán situaes les torres d’alta tensión y ónde van situase les proyeutaes. La marcha tuvo amenizada por una pareya de gaiteros.
 
Tres tornar al Campu la Ilesia, foi'l turnu de les intervenciones: un representante de los coleutivos convocantes lleó un manifiestu, mentes que los afeutaos pola llinia ‘Costa Verde’ y pola ‘Boimente-Pezós’ fixeron lo propio. Pa zarrar, celebróse una xinta popular, a la que siguieron delles  actuaciones musicales. Les organizaciones qu’entamaron esta xornada reivindicativa son la Coordinadora Ecoloxista d’Asturies, Asociación Asturiana de Amigos de la Naturaleza (ANA), Ecoloxistes n’Aición d’Asturies, Greenpeace, Salternavia, Asociación Medioambiental La Cirigueña, SOS Cuideiru, Asociación Ereba Ecología y Patrimonio, Asociación para la Defensa Jurídica del Medio Ambiente ULEX, Asociación Ultravioleta, Grupo d’Ornitoloxia Mavea, Plataforma para la Defensa de la Cordillera Cantábrica, Asociación Medioambiental Ecos Astures, Asociación para la Conservación y Estudio del Lobo (ASCEL), Amigos del Tejo, Colectivo Ecologista de Avilés y les asociaciones de vecinos d’El Remediu, Serín, Fano, Valdornón, La Madera, Celles, Collao, Bimenes y l’Agrupación de Colectivos Asturianos (ACA).

Contador Estadistiques