Ecoloxistes y empreses emponderen el plan español p’aplicar el Protocolu de Kyoto

Con cerca de trés meses de retrasu sobre la fecha que mandaba la Unión Europea, el Ministeriu de Mediu Ambiente asoleyó ayeri'l documentu previu del Plan Nacional d'Asignación d'Emisiones (PNA), plantiya pola que tien d'aplicase nel Estáu Español el Protocolu de Kyoto, documentu qu'obliga a menguar les emissiones contaminantes a l'atmósfera nun 15% sobre lo que se soltaba al aire nel añu 1990.

Esti porcentaxe ye de difícil aplicación nel casu español en cuantes que, ente'l 1990 y el 2.004 España, en cuenta de menguar o contener, xubió les sos emisiones contaminantes nun 39%, polo que'l Plan Nacional acabante de presentar ye'l primer pasu nuna carrera por desfacer lo que s'anduvo nestos 15 años últimos. El Gobiernu presenta'l Plan como un apueste pol aforru ahorro y pola eficiencia nel consumu d'enerxía que tien d'implicar a empreses, alministraciones, consumidores y ciudadanos o pequeños consumidores, que tamién van notar l'aplicación del documentu en forma de xuba del recibu de la corriente

El documentu del PNA apauta como primer oxetivu pa esa baxada que nel bieniu 2005-2007 les emisiones van tener qu'aposentar na media del 2000-2002, mientres que nel periodu 2008-2012, solo va poder emitise un 24% más que la media de 1990, lo que supón una baxada del 15%.

El decretu del Gobiernu reparte l'esfuerzu de mengua d'emisiones ente tolos sectores industriales, tean enxertos o non na directiva, y torga amás la posibilidá de que pueda facese estoyu de derechos d'emisión pa gastalos n'años socesivos y tamién la posibilidá de que les empreses eléctriques puedan facer una partida común colos derechos que-yos correspuendan

Anque los sectores interesaos tienen un plazu d'alegaciones hasta'l 31 de xunetu, en que'l PNA va unviase a Bruseles, de momentu nun parez que vaya haber grandes movimientos de protesta. Intereses opuestos nesti asuntu, como son los de la industria y los grupos ecoloxistes emponderaron ayeri públicamente'l Plan namás conocese.

Asina, los diarios económicos espeyen güei nos sos titulares el contentu de la industria eléctrica, que recibe 88 millones de tonelaes de derechos d'emisión, bien cerca de los noventa colos que contaben les principales industries del sector. Menos alegría hebo nes patronales del metal y del papel, anque tampoco nun descalificaron el documentu, que según tolos analistes favorez a la industria siderúrxica.

Na otra oriella del asuntu, grupos ecoloxistes como Greenpeace califiquen el plan de "realista y moderáu" anque la organización internacional recuerda que "L'asignación de derechos pal primer periodu foi xenerosa enforma y va ser preciso que s'esclarie que va haber que menguar muncho más les emisiones pa garantizar que se cumple Kioto".José Santamarta, director del Woldwatch Institute n'España, tamién ve nesti documentu un pasu "globalmente positivu" y entiende que "Podría ser meyor, porque-y da cantidaes escesives al sector eléctricu, pero tamién muncho peor".