Ecoloxistes n’Acción denuncia problemes de contaminación en Trubia

L'Asociación diz que se ta poniendo en peligru la salú pública na parroquia uvieina y apunta a la empresa "Industrias Doy" como orixe de la contaminación

La organización parte de los datos que-y apurriere'l Serviciu de Xestión Ambiental a l'Asociación de Vecinos "El Machón" de Trubia p'afirmar que los topes llegales de contaminación pa las partícules en suspensión perpásense de contino, lo que lleva a ls conservacionistes a afirmar qu'esiste un peligru real pa la salú pública cuando s'asitien estes cifres sobre les tables qu'apurre l'informe Apheis sobre impactu de la contaminación atmosférica por partícules na salú.

Ello ye qu'esti informe, que se fexo acordies a los datos de 23 ciudaes europees con una población conxunta de 36 millones d'habitantes llegó a la conclusión de que si se menguaren los niveles de partícules en suspensión hasta un tope de 20 µg/m3 podríen evitase a curtiu plazu más de 2.500 muertes prematures, les más d'elles por causa respiratoria, una cifra que nun largu plazu pue multiplicase esponencialmente.

Ecoloxistes n'Acción diz que les mediciones más esmolecedores vienen d'una estación asitiada nuna faza atiestando cola fábrica de "Industrias Doy" y na que se perpasaron, sobre 59 mediciones feches ente xunetu y setiembre, un total de 49 vegaes los 50 µg/m3 (micrográmetros per metru cúbicu) , con valores medios de 72 µg/m3 y topes d'hasta 125 µg/m3. Un valor que pasa con muncho los 40 µg/m3 que son el Valor Tope Añal pa esti contaminante.