Ecoloxistes dicen que la CUOTA pronuncióse contra la mina de Salave

Tres de dase a conocer al públicu'l proyectu de la empresa Rio Narcea Gold Mines pa facer una mina d'oru en Os Llagos de Silva (Salave-Tapia) la Coordinadora Ecoloxista d'Asturies manifestó ya'l mes pasáu la so refuga total al proyectu y solicitó-y a l'alministración autonómica que lu desestimare. Agora, el colectivu conservacionista ta acabante de volver a ponese en contactu cola alministración autonómica, esta vegada pa pidir que dea razones de por qué se-y dio a la empresa un permisu d'investigación venceyáu al proyectu d'esplotación del yacimientu auríferu cuando según los ecoloxistes, existe una resolución de la Comisión d'Urbanismu y Ordenación del Territoriu d'Asturies (CUOTA) con fecha del 23 de setiembre del 2004 que diz esplicita y claramente que l'actividá minera nun ye apta nesa zona.

El proyectu de Salave supondría la creación d'una mina a cielu abierto na mesma costa del conceyu de Tapia. Esta mina tendría'l so centru d'operaciones nun cráter de 600 metros de diámetru (sobre 28 hectárees de superficie) y qu'afuracaría'l suelu hasta llegar a los 200 metros,onde s'asitia la capa de mineral bono. Xunta ello, la mina precisaría tamién d'un "área de serviciu" na que dir poniendo tolos servicios auxiliares de la mesma, qu'incluyen una escombrera d'ente 120-180 hectárees y la planta de tratamientu de mineral, que pue tomar sobre otros 30.000 metros cuadraos.

Los ecoloxistes sorrayen l'altu valor cultural y paisaxísticu d'Os llagos da Silva, que s'asitien talamente na rasa costera, a unos 200 m al Oeste de la playa del Figo y cerca de 2.000 m al Este de Tapia, y remembren que l'actividá minera nesta zona ye incompatible dafechu cola actual normativa urbanística y d'ordenación del territoriu, atacando les Directrices Subrexonales d'Ordenación del Territoriu pa la Costa y el más de recién Plan d'Ordenación del Litoral d'Asturies (POLA).

Poles dimensiones y allugamientu del proyectu, los ecoloxistes albidren un "impactu severo o críticu" no tocante a paisaxe, amás d'impactos severos na población humana y animal, con índices altos de ruíu, polvu en suspensión y tráficu pesao, ente otres consecuencies, amás de la ruina de l'agricultura en tola redolada de la mina. Nel so escritu, los ecoloxistes denuncien que los daños sobre la calidá de vida humana puen afectar, y muncho, al turismu que visita Tapia, Mántaras y Salave.