Ecoloxistes celebren la suspensión cautelar del desmonte d’Aboñu

La Coordinadora Ecoloxista vien d’espresar el so prestu pola suspensión cautelar qu'ordenó'l Tribunal Supremu del  Plan d'Usu d'Espacios Portuarios d'El Musel nel ámbitu de Carreño.

Esta resolución, supón  la paralización del desmonte del Altu Aboñu que quier facer l'autoridá portuaria de Xixón y el Principáu. Los ecoloxistes recuerdes qu’esta operación principió col “derribu ensin llicencies de les viviendes y construcciones existentes na zona”.

“Siempre tuvo claro que la finalidá de les obres ye consiguir rellenos baratos y cercanos pa les obres del Musel, ensin importa-y a l'Autoridá Portuaria l'impactu d'esta obra sobre la redolada, col puertu casi acabáu, yá nun paez que tenga muncho sentíu esti desmonte”, denuncien los ecoloxistes.

Al empar, insisten en que la resolución xudicial amuesa que “les obres de l’ampliación del Musel tienen numberoses irregularidaes na so tramitación”.

Impactu del desmonte
La Coordinadora Ecoloxista d’Asturies alvierte amás que, si a la fin execútase’l desmonte, va tener “un bultable impactu sobre’l paisaxe”, en cuantes que s’atopa na costa; “sobre la población”, porque na zona prevista alcuéntrase cercana la urbanización de Xivares; y un “signifiativu impactu acústicu” por mor de les obres.

“Esperemos que'l desmonte pase a ser hestoria y se pase a esixir la responsabilidá de los que permitieron los derribos nel Altu Aboño”, sentencien los ecoloxistes.