Ecoloxistes avilesinos denuncien un vertíu nuevu a la ría

|

El Coleutivu Ecoloxista d’Avilés alertó al Gobiernu y al Seprona sobre l'apaición d’un vertíu nuevu na ría esta fin de selmana que provocó la muerte de docenes de pexes. Critiquen la permisividá de l’Alministración ante esti tipu d’aiciones.
 
El 2 de payares pasáu ocurrió un episodiu similar del que pudieron vese les consecuencies a l’altura de la pasarela del Centru Niemeyer. Un mes depués, torna a repetise la situación, nesta ocasión na cola de la ría. Dellos pexes muertos nes orielles de la ría na tarde del domingu faen sospechar a los ecoloxistes d’un vertíu nuevu que pudo producise la nueche del sábadu. Una “llista interminable d‘episodios contaminantes” que sufre la ría d’Avilés y que “siguen produciéndose con demasiada frecuencia pa vergoña de les autoridaes que lo permiten”, señelen dende’l Coleutivu. Por ello reclamen a l’Alministración qu’investigue sobre la sustancia echada a la ría y el so orixe.
 
Los ecoloxistes avilesinos alerten sobre qu’esta situación pue agravase cuando se ponga en marcha l’emisariu submarín, “una instalación que, como tol mundu sabe, namái sirve pa treslladar la contaminación d’un sitiu a otru”. El Coleutivu considera que cola so puesta en marcha los vertíos van continuar pero yá nun van ser visibles, afectando a les playes y fondos marino de tol entornu del Cabu Peñes.

Contador Estadistiques