Ecoloxistes alerten del peligru del ozonu n’Uviéu

La Coordinadora Ecoloxista punxo ayeri una petición oficial d'información al conceyal de Mediu Ambiente del Conceyu d'Uviéu sobre les midíes que podríen adoptase pa menguar los niveles d'ozonu troposfericu que se dan na ciudá y que son los más altos d'Asturies con diferencia.

Ye agora en branu cuando se dan los valores más altos d'e concentración d'esti gas, imprescindible nes capes altes de l'atmósfera pa qu'espeye la radiación ultravioleta del sol pero dañible enforma pa la salú humana si s'alcuentra na troposfera, onde se desarrolla la vida. El branu ye la estación na que tradicionalmente se da una concentración más alta d'esti ozonu troposféricu. L'añu 2004 Uviéu llegó a pasar en 7 ocasiones la llende de protección a la salú humana na concentración d'esti gas (120 ug/m3 acordies col BOE de 13-1-2004) y 39 vegaes la llende de protección a les plantes (un tope que s'asitia nes 65 unidaes).

La concentración d'ozonu a nivel del suelu nesti tiempu de branu vien de la lliberación a l'atmósfera de sustancies precursores del ozonu que'l calor y l'acción del sol faen reaccionar hasta convertise en molécules d'ozonu. Según los ecoloxistes, nel casu concretu d'Uviéu, el tráficu rodáu ye'l responsable principal de la emisión de precursores del ozonu, anque nello influye tamién l'alta densidá uindustrial que se da na redolada del conceyu.

L'ozonu entra al cuerpu pela vía respiratoria y por ser un gas oxidante enrita les mucoses y el texíu del polmón, causando en primer instancia enritamientu de güeyos, tos y dolor de cabeza, llegando en casos más graves a inflamaciones series nel aparatu respiratoriu. Los asmáticos y enfermos de bronquios y polmón son los grupos más espuestos, anque l'alta concentración d'ozonu daña a toles criatures vives, causando nes plantes una mengua de la fotosíntesis y del crecimientu.