Ecoloxistes alerten d’un aumentu del tamañu de los aeroxeneradores proyeutaos n’Ourubio

|

La Coordinadora Ecoloxista d’Asturies presentó alegaciones al trámite d’información pública del parque eólicu d’Ourubio. Los ecoloxistes nun ven xustificable l’aumentu considerable del tamañu de los aeroxeneradores.
 
Nun primer momentu taba prevista la instalación d’once de dos megawatios con un altor de pala de 118 metros, mentes qu’agora se pretenden mantener los mesmos once anque muncho más grandes: pasaríen a tener 48 metros más d’altor de pala pa llegar a los 166 metros. “Nun vemos xustificación al incrementu notable de tamañu de los aeroxeneradores; si fora por una mayor eficiencia y un supuesto menor impautu global de los mesmos, nesti casu, l’aumentu de tamañu nun supón un númberu menor d’aeroxeneradores a instalar”, espliquen dende la Coordinadora.
 
Amás, los ecoloxistes atopen munches irregularidaes nel estudiu d’impautu ambiental d’esti parque eólicu proyeutáu ente los conceyos de Pezós, Eilao y Samartín d’Ozcos, como ye l’ausencia del Plan d’autoproteición contra incendios forestales, l’Anteproyeutu de restauración y integración paisaxística, l’Estudiu de modelización acústica, l’Anteproyeutu d’esmantelamientu y l’Anteproyeutu de restauración, a lo qu’hai que sumar que los trabayos de fauna nun son d’añu natural. D’igual forma, señalen que van tar a menos de 1.000 metros de poblaciones como Brañavieya, asitiada namái a 396 metros, colos problemes que producen l’aición de los aeroxeneradores ente les persones, llegando a causar insomniu y nerviosismu pol ruíu y los infrasoníos qu’emiten.
 
Por último, recuerden la so cercanía a llugares de valor arqueolóxicu, les muertes que provoquen ente les aves y el fechu de que sía ún de los 99 parques eólicos proyeutaos nel occidente asturianu, lo que provocará un impautu por efeutu acumulativu, ensin escaecer les llinies d’evacuación y les subestaciones llétriques que conlleven.

Contador Estadistiques