Echó a andar la obra de la variante de Payares

El presidente del Gobiernu José Luis Rodríguez Zapatero asistió ayeri pela tarde en Lleón al actu d'inauguración de la obra de la variante de Payares, primer pasu nel procesu pa baltar definitivamente l'arrequexamientu d'Asturies cola meseta. N'acabando la obra, cosa que ta prevista pal añu 2009, Asturies y Lleón van quedar a 34 kilómetros menos de distancia al sustituyir la llinia nueva a les ramples del trazáu actual, una reliquia ferroviaria que data del añu 1884, siendo la previsión que'l trayectu nun pase de la hora y cinco minutos ente Xixón y Lleón nin de 35 minutos ente la capital asturiana y Lleón. Madrid va quedar tamién a una distancia llendada hasta agora al avión: dos hores y cuartu.

2.313 millones d'euros faen d'esta obra una de les mayores na historia de les infraestructures asturianes, y ye que la obra ye complicada enforma, en cuantes que ye preciso afuracar dos túneles de 25 kilómetros de piedra, amás de la falta de respiraderos y otres estructures complementaries, pero ello ye que la linia resultante, pela que van circular trenes d'alta velocidá, va resistir tráficu de pasaxeros y un trasiegu intensu tamién de mercancíes, sometiendo a la llinia a un gran esfuerzu mecánicu. Por ello, va tratase d'un trazáu de velocidá alta, con velocidá máxima de 250 kilómetros a la hora y non d'alta velocidá, que tien el tope pa circular nos 300 km/h.

La variante, que tien de tar funcionando pal 2.010, llega de cualquier manera con retrasu. En tiempu de la UCD, allá pel añu 1980 tuvo nun tris de facese, pero la crisis d'aquel gobiernu dexo'l proyectu pa prau. La variante volvío a l'actualidá en 1.989, cuando'l gobiernu socialista aneciaba en nun facela y tola oposición armó una plataforma que se manifestó per Uviéu más de 100 años depués de la marcha cívica que pidiere en 1881 la construcción de la vieya rampla ferroviaria. El gobiernu del PP acabó por almitir la variante nel so plan d'infraestructures ferroviaries, que diseñó la cadarma de la velocidá alta na península, pero nos planes de Fomentu la construcción del ramal asturianu diba depender siempres de que se ficiere primero'l tunel del Guadarrama, la otra variante qu'hai nel exe Madrid-Asturies.

La obra va tener un impactu mediuambiental grande. Yá cuando se diseñaron los túneles baxo'l mandatu anterior del PP dicíase que los 50 kilómetros de túneles que van afuracar la cordal que nos estrema de la meseta diben producir 9,8 millones de metros cúbicos de tierra y piedra, de los que se contaba con almacenar bien d'ello n'escombreres que quedaríen pa la parte asturiana del tunel. Ello resulta nun estrozu grande pal Va.le Huerna, que ye amás fastera importante nos planes de recuperación del osu y del faisán montés, dambes especies en trance de desanicie. Por munchu precuru que se ponga n'amenorgar l'impactu ambiental, como demuestra la midida de plantar 55.000 árboles pa tapar el tren, nun cabe dulda de que'l conceyu de L.lena va notar la obra.
Entrar a esta web pa conocer la historia del pasu del Puertu Payares