Echa andar la edición d'esti añu del Concursu de Folk "Cuartu de los Valles"

Col calor del bon tiempu entamen a surdir per toa Asturies diferentes iniciatives musicales, una a la que tamos avezaos ye'l concursu de grupos de folk "Cuartu de los Valles" de Navelgas.

Los díes 23 y 24 de xunetu va celebráse en Navelgas, Tinéu, la V edición del Concurso Festival Folk "Cuartu de los Valles". A esti concursu pueden presentáse grupos con trés o más componentes y pa ello hai que mandar enantes del 31 de mayu una maqueta o discu editáu CD con un mínimu de cuatro temes a: V Concursu folk "Cuartu de los Valles". Casa de la Cultura. 33873 Navelgas (Tinéu), Asturies. Enantes del 20 de xunu va dase anuncia de los cinco grupos seleccionaos pol xuráu. Los premios del concursu son de 1º clasificáu: 1500€ - 2º clasificáu: 600€ - 3º clasificáu: 300€ - 4º clasificáu: 300€ - 5º clasificáu: 300€. Amás colos cinco grupos finalistes va editáse un discu promocional, y amás el xuráu va tar formáu por programadores musicales d'España y Portugal, que van valorar el so directu pa llevalos a los sos festivales.

Esti concursu ta convirtiendose nuna bona rampla de salida de munchos grupos folk del estáu español. La preba ye que los cuatro ganadores de les ediciones anteriores, "Llangres", "Antubel" de Lleón, "Cambera'l Cierzu" Cantabria y "La Jambre" de Cádiz son grupos que siguen furrulando, los más d'ellos con proyectos discográficos en marcha. Una posibilidá pa grupos que tan entamando de probáse a si mesmos y enseñar al públicu y promotores la so forma d'interpretar el folk.