“¡Echa al Trasgu! ye un xuegu de temática asturiana pa divertise en cualquier llingua”, apunta Félix Fernández

Acuto Xuegos presenta pa esta Navidá una novedá nel so catálogu. La empresa familiar que crea materiales n’asturianu tien a la venta ‘¡Echa al Trasgu!, “un xuegu de temática asturiana pa divertise en cualquier llingua”, na que los protagonistes son los seres de la nuesa mitoloxía.

“Ye un xuegu de cartes nel que tán presentes seres mitolóxicos de toa Asturies y otros más llocales, como’l Pataricu, el Papón o la Moura”, esplica Félix Fernández Rodríguez, responsable d’Acuto Xuegos. Pa “un públicu familiar, a partir de los 8 o 9 años y adultos”, consiste n’enllenar el llar de los cuatro personaxes principales –ha escoyese ún–, la Xana, el Busgosu, el Nuberu y el Cuélebre, al tiempu de torgar que los otros xugadores lo faigan.

Pa ello pue unviase al llar de los rivales al trasgu, yá que pa ganar ye necesario echar a esti ser de casa al traviés de cartes especiales con tradiciones coles que los rellatos populares espliquen cómo sacalu cuando t’entra na to vivienda. “D’ehí vien el nome del xuegu”, apunta Fernández Rodríguez, que lu define como “dinámicu y fácil de xugar”.

En total son 64 cartes, 24 de llar y 40 de xuegu, amás de les instrucciones, que vienen n’asturianu, gallego-asturiano y castellano: “¡Echa al Trasgu! ye un xuegu de temática asturiana, dalgo que nun había, pa divertise en cualquier llingua”, rescampla. Y ye que, “a diferencia de los anteriores xuegos d’Acuto, que teníen el conceptu d’utilidá llingüística, ésti decidimos centralu nes tradiciones d’Asturies”.

El preciu de ‘¡Echa al Trasgu!’, editáu gracies a una campaña de micromecenalgu na rede que recaudó 1.765 euros de los 1.100 mínimos necesarios pa echar a andar el proyeutu, ta a la venta a un preciu de 20 euros en dellos puntos del país. Son los siguientes: Avilés Qué Guapina Yes, Olmar Regalos y el puestu de Tiza y Peonza nel Mercáu de Navidá, n'Avilés; Puru Remangu y Big ant Small, en Xixón; Llibrería Trabe y Pintar-Pintar, n'Uviéu; Decalupa, en Mieres; El Rincón de María, en La Pola Siero; Susana Papelería y Regalos, en L'Entregu; Librería Clarín, en La Felguera; Librería Loli, en Morea; La Jirafa, en Ribeseya; Muniama, en Cangues d'Onís; y La Semeya, en Noreña.

Na semeya, dalgunes de les cartes del xuegu.