Echa a andar la escuela la Quintana de Xixón

Cola novedá d'una nueva asignatura, la de flauta travesera, la escuela de música tradicional "La Quintana" de Xixón entama'l cursu 2004-2005.

Con esti yá son siete los años que lleva la escuela la Quintana poniendo clas de música asturiana nel conceyu de Xixón. La ufierta d'asignatures que pon "La Quintana" entama cola Asturianada, que pon Horacio Huerta, vigulín y bandurria con Daniel García de la Cuesta, curdión diatónicu con Xuan Nel Expósito, tambor asturianu y percusión con David Varela, gaita con Diego Pangua y Pedro Pérez y Harpa Céltica con Xavier Gómez. Xunta ello, impártense tamién les asignatures de baille, zanfona y guitarra. D'otra parte, la escuela tamién pon clas de Llinguaxe Musical y Folclor como forma de completar la formación de los alumnos nel instrumentu qu'escueyan. La novedá d'esti añu dientro del programa educativu ye la flauta travesera de madera, instrumentu que va enseñar el tamién profesor de gaita y flauteru de "Felpeyu" Diego Pangua.

La escuela de música tradicional la Quintana tien los sos locales na Escuela Pública "Rey Pelayo" n'Avenida de la Constitución de Xixón. La matricula ta abierta tol añu y pa ponese en contactu cola escuela puede llamase a los teléfonos 687 83 07 02 y 985 16 25 84.