Echa a andar la denominación d'orixe de la sidra

La Sidra acoyío a denominación d'orixe va representar de momentu un tantu por cientu simbólicu dientro de lo que ye la venta total de sidra, estimándose una producción de 1,5 millones de llitros sobre un total de 45, pero la entrada de la denominación supón un pasu históricu pa un sector que lleva una década d'espoxigue y de meyora. Con too y con ello, va haber qu'esperar un poco pa prebar la primer sidra con denominación, en cuantes que tamos en febreru y lo que se pisó esti añu entovía ta ensin corchar.

De los 20 millones de llitros de sidra que se vienden al añu, lo de denominación nun va representar más del 5% de la producción total, pero va ser una sidra fecho polo menos con un 51% de mazana asturiana esbillao de les 22 clases de mazana qu'entren na denominación y producíes nes pumaraes rexistraes en Conseyu. En pasando un periodu d'adaptación de 7 años, el tantu por cientu de mazana asturiano que s'emplegue en facer sidra con denominación va tener que ser del 100%. La denominación estrema sidra de trés frasques distintes. Lo natural dafechu, lo que se conoz como "de nueva espresión" o sidra de mesa, que tien más burbuya, y lo que lleva gas artificial, que se-y amiesta pel métodu "champenoise".

El Conseyu dio anuncia de que d'agora en p'alantre queda prohibío que los llagares que nun tean daos d'alta en rexistru del Conseyu empleguen pa lo que corchen ellos espresiones como "sidra d'Asturies" "sidra asturiano" o otres asemeyaes que puean llevar a enquivocu cola sidra de denominación.

La Web del Conseyu Regulador de la Sidra con Denominación d'orixe tien abonda información sobre esta sidra nuevo. Llamentablemente, pa un productu tan identitariu como ye la sidra, el Conseyu apostó namás por facer propaganda en castellanu y por poner tola so imaxe corporativo nesta llingua. Muncha diferencia respective al mundu de la sidra vasco, qu'apuesta poles denominaciones n'euskera pa dase a conocer. Pa tar al tantu de novedaes sobre'l mundu de la sidra, paga'l tiru conocer la revista asturiana La Sidra, que depués de llevar dellos númberos en papel, ta acabante d'estrenase na rede.