Echa a andar el Conseyu Consultivu d'Asturies

El presidente Asturianu,Vicente Álvarez Areces, presidió ayeri la toma de posesión de los miembros del Conseyu Consultivu del Principáu, que va pasar a ser l'órganu superior de consulta d'Asturies, con una capacidá equivalente a nivel autonómicu a la del Conseyu d'Estáu.
La llei que regula esti órganu nuevu creóse yá'l pasáu mes d'ochobre, y el presidente asturianu sorrayó la so importancia que supón "culminar el nuestru desarrollu estatutariu y autogobiernu, col fin de serví-yos meyor a los ciudadanos dende la prosimidá y poder facer una eficaz xestión pública". Areces llegó a declarar que gracies al Conseyu Consultivu "produzse un avance importante na nuestra institucionalización como Comunidá Autónoma, como pueblu con una historia, una identidá y unes instituciones propies".


La llei manda que'l Conseyu tenga autonomía orgánica, presupuestaria y reglamentaria, correspondiéndo-y el nombramientu de los cinco vocales que lu componen a la Xunta Xeneral del Principáu, que los va escoyer por mayoría cualificada, como al Conseyu de Gobiernu; la duración del so mandatu nun va tar acoplada a los periodos de llexislatura.

Los dictámenes qu'emita'l Conseyu, tanto los preceptivos como los facultativos, han fundamentase en derechu y tendrán de valorar aspectos d'oportunidá y conveniencia cuando se solicite. Como norma, nun van tener calter vinculante, anque en nengún casu van poder sometese a otru informe posterior en cuantes que'l Conseyu Consultivo ye, por definición, el más altu órganu de consulta xurídica d'Asturies, con función d'altu asesoramientu a toles instituciones de l'alministración asturiana y a les entidaes locales.

Los cinco primeros miembros colos que va echar a andar esti nuevu órganu son el Caderalgu de Derechu Constitucional Francisco Bastida, la Secretaria Xeneral Técnica de la Conseyería de la Presidencia Luisa Fernanda del Valle, l'ex - presidente d'Asturies Juan Luis Rodríguez Vigil y el que fuere delegáu del gobiernu na primer llexislatura del PP, Fernando Fernández Noval, que vvan actuar como vocales, mientre que la presidencia correspuendé-y al que fuere vicepresidente autonómicu Bernardo Fernández.