Duro Felguera llogra un contratu de 128 millones en Bielorrusia

Duro Felguera axudicóse un contratu pal diseñu y suministru llave en mano d'una unidá de procesu de coquización tardía pa l'ampliación de la refinería de Novopolotsk, en Bielorrusia, por importe de 128 millones d'euros. 

Según informó Duro Felguera, el nuevu contratu, soscritu cola empresa estatal OJSC Naftan, súmase al que la compañía asturiana firmó a mediaos del pasáu añu col mesmu cliente pal suministru de los equipos principales de la nueva instalación, destinada al aprovechamientu de residuos del procesu de refinu. Ambes axudicaciones totalicen más de 160 millones d'euros.
   
La compañía espera llograr nueves axudicaciones pal suministru d'otros equipamientos con destín a esa refinería asina como a otres instalaciones asemeyaes en dellos países d'Europa, Llatinoamérica y Asia.