DRD van ponese a grabar discu

Nes próximes selmanes el tríu "DRD" va grabar
el so primer discu y facer unos conciertos per Asturies. Tanto pa la
grabación como pa los conciertos va contar cola collaboración de
Jarlath Henderson, músicu tradicional del añu 2003 según
la BBC con namás que 17 años.



El tríu DRD, formáu por Dolfu Rodríguez nel
vigulín, Rubén Bada nel bouzouki y Diego Pangua a la xiblata, prepara'l so
debut discográficu a partir del día 3 de marzu. Esti grupu
surdió tres de xuntase pa tocar estos trés músicos pa un
ciclu que se llamó Folk de Cámara, que se desenvolvió va
agora añu y pico. Col tiempu la formación y el trabayu en
conxuntu aposentaron la formación, y frutu d'ello ye qu'agora van facer la so primera
grabación d'estudiu.



El discu va grabase nos estudios "Tutu" de Corvera, cola ayuda
del técnicu de soníu Sergio Rodríguez, y
l'autoproducción musical de los propios miembros de "DRD". La
banda nun tien decidío con que compañía va sacar el discu,
asina que pel momentu quieren llevar alantre la grabación y decidir
depués la forma de la so publicación.



D'otra manera, nel discu va rescamplar la collaboración d'un
músicu que d'un tiempu a esta parte fízose bien amigu del
tríu. El casu ye que'l bouzouki de "DRD", Rubén Bada,
pasa bona parte del añu n'Irlanda, y ellí pudo entrar en contactu
con músicos del país, ente los que ta
Jarlath Henderson, un
gran y mozu gaiteru que consiguió ser reconocío como'l meyor
músicu tradicional según la BBC nel 2003. Agora collabora con
"DRD", sobre too nes visites que fai'l grupu a Irlanda, como por
exemplu la del próximu 25 de febreru, que va llevalos a tocar a Belfast
nel "Kelly's Cellars", y el 26 de febreru a Dungannon (cerca de
Derry), nun festival de música tradicional.



Nes próximes selmanes diremos informando n'Asturies.com de
los conciertos de DRD n'Asturies, anque yá tán confirmaes les sos
actuaciones nel Teatru Campoamor d'Uviéu, y en dellos locales de
Xixón y Uviéu.