Dos maneres de ver el mundu

Les dos corrientes d'interpretación de la globalización aconceyen güei n'escenarios bien estremaos. D'una parte, na ciudá de Nueva York, nel hemisferiu norte, el multimillonariu George Soros convoca la 32ª xunta del Foru Económicu Mundial, qu'enxerta a los pexes más gordos de les finances, representantes de los gobiernos más fuertes y a una riestra de periodistes y intelectuales acordies col pensamientu neolliberal que va desarrollar la so liturxa d'equí al llunes de la selmana qu'entra. D'otra parte, nel hemisferiu austral, la ciudá brasileña de Porto Alegre ye la sé del II Forum Social Mundial, un conceyu qu'axunta a toles persones y organizaciones que trabayen a la contra de la doctrina qu'esparde l'esclusivu club de Soros. Dende'l primer Porto Alegre a esti pasó un añu nel que se desarrollaron los debates que se plantegaren. Pa favorecer ei debate, amás del web oficial del Forum hai esti otru dedicáu al discutiniu de les propuestes que se presenten. la prestixosa revista Le Monde Dipllomatique tien esti completu dossier sobre la tema. Porto Alegre 2002 llega poco dempués de la desapaición del sociólogu francés Pierre Bordieu, que l'añu pasáu foi un de los animadores del "Otru Davos", eventu que sirvió d'oposición a l'anterior xunta del Foru Económicu. Nel web del "otru Davos" puen vese delles intervenciones d'esti autor.La cita brasileña tamién coincide nel tiempu cola apaición de la sección asturiana d'ATTAC (Asociación por una Tasa a les Transacciones Financieres d'Ayuda a los Ciudadanos), una de les organizaciones más importantes nel movimientu antiglobalización y de les que más conteníu ta dando-y al so discursu. Nun hai web propia d'ATTAC-Asturies, pero'l so manifiestu yá pue lleese. La influencia d'ATTAC en dellos países trescala l'ámbetu antiglobalización. En Francia, el discursu d'ATTAC ta enxertáu nel debate políticu, y preba d'ello ye que'l 19 de xineru, ATTAC Francia aconceyó a más de 6.000 persones en París col oxetu de preparar el so discursu con vistes a la campaña electoral que va vivir el país d'equí a bien poco.

Contador Estadistiques