Dos goles d’Arthuro salven al Sporting de perder en casa

El peor Sporting del añu xugó ayeri contra'l Ciudá de Murcia, qu'ocupa plaza de descensu a 2ªB, el peor partíu del añu. El mesmu Marcelino reconoció n'acabando'l partíu que los d'elli nun merecieren nin empatar.

El Sporting salió queriendo mandar, pero escosó les poques idees que tenía mientres l'equipu murcianu diba comiendo-y al conxuntu local les posiciones decisives El Ciudá de Murcia facíase adulces col control, llabor fácil en cuantes que pa ello yera abondo con controlar a Javi Fuego, Carmena y Chus Bravo y aprovechase de la poca velocidá del Sporting, que llegaba tarde a tolos pases y a tolos balones. Omar y Ismael taben solos arriba ensin que-yos llegare un mal centru, mientres que l'equipu murcianu sí yera a allegase a la meta asturiana, con un par d'ocasiones pa Güiza, anque tampoco ensin crear munchu peligru.

La segunda parte entamó con xugada polémica, reclamando los asturianos penalti y espulsión nun derribu del porteru murcianu Javi a Ismael na raya del área, pero Clos Gómez nun castigó l'acción más que como falta y decidió nun echar al porteru visitante. Darréu d'ello llegó'l gol del Murcia, que s'adelantaba nel minutu 55 de partíu. Rivero pegó un tiru cruciáu que confundió a Roberto, que se tiró pa la parte que nun yera. Col gol del enemigu, el Sporting, que yá taba xugando mui mal, desfízose dafechu. Marcelino tentó d'aposentar el conxuntu poniendo a Samuel atrás y al brasileñu Arthuro alantre, pero con too y con ello'l desarrollu de los acontecimientos paecía más cerca del 0-2 que del empate. Cuando menos se contaba con ello, un centru de Xuan que llegó a la cabeza del rapidísimu Arthuro entornó la suerte del partíu, marcando'l delanteru sudamericanu dende la frontal del área.

Dende esi intre'l partíu allorió dafechu y entró nun final nel que dambos equipos xugaron como si aquello fuere un patiu d'escuela. Trés minutos dempués d'empatar el Sporting, Rivero alcontró la pelota perdía nel mediu'l campu y corrió como un diañu con ella; ensin que Samuel-y la pudiere quitar y viendo a Roberto adelantáu, el futbolista del Ciudá de Murcia picóla lo xusto pa que'l porteru del Sporting nun pudiere torgar la trayectoria del tiru. Yera'l 1-2 y faltaben trés minutos pal final, pero'l partíu tenía entovía otra sorpresa y Arthuro otru cartuchu guardáu, esta vegada a pase d'Omar, batiendo por baxo al arrebatedor murcianu cola zurda. Empate a dos y nervios enantes del pitíu final porque'l Ciudá de Murcia forzó un corner últimu que punxo a preba a la defensa asturiana.

El Sporting sigue a trés puntos de la zona de descensu y ve como la delantera de la tabla se-y escapa ensin remediu. Lo único bono d'ayeri pal equiu foi l'apaición d'Arthuro, inéditu esti añu nes alliniaciones del Sporting y decisivu pa salvar un puntu d'oru. Eso, y la suerte de que dos frayos de los murcianos espetaron nos postes ensin convertise en goles.