Dos esposiciones n'honor a Andrés Solar

Dempués de trés díes de selmana de les Lletres, la figura humana y lliteraria d'Andrés Solar ta pasando nun segundu planu énte cantidá de declaraciones sobre la situación del idioma que tan faciendo los representantes oficiales d'instituciones y colectivos en cada actu que s'organiza.

Ye por ello que ye preciso falar de les dos esposiciones qu'esta selmana llevanten acta de la vida y obra del escritor de Deva. D'una parte, nel Antiguu Institutu Xovellanos de Xixón pue vese a lo llargo de tola selmana la exposición "Andrés Solar, una voz del surdimientu". Esta amuesa devuelve-y al públicu la vida del escritor y tamién ayuda a facese una idea del referviente movimientu de reivindicación llingüística y política nel que-y tocó vivir a Andrés Solar. Xunta los paneles con testos y semeyes y les vitrines con materiales, na esposición proyéctase tamién un vídeo con entrevistes a la xente que tuvo más allegao a Andrés Solar y nel que se recuperen dellos documentos visuales d'época.

D'otra manera, ayeri pela tarde l'homenaxe a Andrés Solar siguió col descubrimientu d'una placa nes Antigües Escueles de Deva. Nesta antigüa escuela, anguaño remocicada y reconvertída en viviendes, foi onde estudió les primeres lletres Andrés Solar, quien dende ayeri vuelve a ocupar simbólicamente l'antigua escuela cola esposición "Llingua Solar" entamada pol Foru Arte Ciudá. Si la primer esposición sorraya los conteníos biográficos sobre l'autor, esta segunda enseña'l trabayu d'un garapiellu bien curiosu d'artistes asturianos que s'inspiren na lliteratura de Solar pa facer les sos obres. Na riestra de nomes que participen nesta esposición alcontramos, ente otros, a Astur Paredes, Maite Centol, Pablo Mojo o Adolfo Manzano. Esta esposición va poder vese hasta'l domingu nel local de l'asociación de vecinos de Deva que s'asitia nel baxu de les antigües escueles, y tien horariu d'apertura de 6 a 8:30 hasta'l sábadu y el domingu de 12 a 2.