Dos centenares de persones arrodiaron la Xunta Xeneral en solidaridá coles marches de Madrid

Más de 200 persones acudieron a la convocatoria fecha pol Movimientu 15-M Asturies y el CSOA La Madreña p’arrodiar la Xunta Xeneral en solidaridá coles marches hacia’l Congresu de Madrid. N’Avilés hubo una aición similar na Casa Conceyu.

Pese a lo espontáneo d’esta aición –nun se contaba con permisos– y una presencia policial importante, ésta trescurrió ensin incidentes. Los manifestantes agolpáronse alredor de les 19.30 hores frente a la entrada al edificiu de la Xunta Xeneral, onde dellos coleutivos, ente los que s’atopaben los trabayadores d’HP, tomaron el micro pa espresar les sos reivindicaciones y inquitúes. Darréu, sobre les 20 hores, los presentes arrodiaron de manera simbólica’l palaciu p’amosar la so solidaridá coles persones presentes nes marches de Madrid baxo la convocatoria ‘Toma el Congreso’, onde había una representación asturiana amplia. Nesi momentu, yá se daben los primeros datos de feríos y deteníos na capital castellana.

Tres axuntase otra vuelta na puerta del edificiu, los manifestantes decidieron tomar rumbu a la sede del Serviciu de Salú del Principáu d’Asturies (SESPA) pa sofitar a los delegaos de CC OO, UXT, SATSE, Usae y Sicepa/Usipa que lleven 29 xornaes zarraos nel llugar en defensa de la sanidá pública y de los trabayadores del sector. La Policía negóse a que la marcha cortara les cais, asina que, tres cruciar Escandalera y pasar frente al Campoamor, los presentes aportaron a la plaza asitiada frente al edificiu qu’acueye les instalaciones del SESPA. Los sindicalistes agradecieron dende la ventana l’apoyu d’estos ciudadanos y denunciaron la postura del Gobiernu por negase nin siquier a negociar. Alredor de les 21 hores, y tres llanzar glayíos en defensa de lo público y contra los recortes y los dos partíos mayoritarios, los manifestantes disolviéronse ensin incidentes.

En Madrid, 35 deteníos

La delegada del Gobiernu estatal en Madrid, Cristina Cifuentes, confirmó esti miércoles que les manifestaciones d'ayeri que pretendíen arrodiar el Congresu terminaron con 35 deteníos y 64 mancaos, de los que 27 son axentes del orde. Decenas de miles de persones participaron nesta aición convocada peles redes sociales y na que la Policía tornó a cargar de manera violenta contra los presentes.