Dos cascos de bronce de la época castreña únicos n’Europa incorpórense a la coleición del Arqueolóxicu

|
Cascu época castreña Arqueolóxicu

“Representen un testimoniu únicu de la Edá del Fierro na Península Ibérica y n’Europa”, esplicó Berta Piñán, conseyera de Cultura, Política Llingüística y Turismu, na presentación en sociedá d’esti afayu fechu n’avientu del 2020 en Ribeseya. Los dos cascos de bronce dátense nel sieglu VII enantes de la nuesa era y tán espuestres de manera temporal nel Muséu Arqueolóxicu d’Asturies.

Una cueva d’El Picu Torres, cercana a la población de Cueves, foi’l llugar onde s’atoparon estes dos pieces úniques nel repertoriu del armamentu prehistóricu européu descubiertu hasta’l momentu xunto con restos óseos y cerámicos. Un particular dio avisu y l’equipu téunicu del Arqueolóxicu encargóse del estudio, análisis y tratamientu curativu d’entrambes.

Según espliquen, los dos casquetes presenten munches asemeyances formales, pero los primeros estudios conclúin que foron fabricaos por diferentes artesanos nun periodu que podría asitiase ente lo último de la Edá del Bronce y lo primeros de la Edá del Fierro, momentu históricu en qu’apaecen los primeros castros n’Asturies. Tán fechos sobre una placa de bronce con doble encaxe simétricu p’anclar penachos o cornamenta; llucen apliques fundíos en bronce plomao y fixaos per aciu de remaches, y tán decoraos con bandes llabraes a martiellu.

Les pieces van quedar espuestes temporalmente na sala del muséu dedicada al entamu de la cultura castreña o primera Edá del Fierro. Amás de los correspondientes paneles esplicativos va proyeutase un curtiu documental nel que se rellata’l procesu de tratamientu dende’l so afayu, ilustrando de manera didáutica cómo ha atendese un descubrimientu arqueolóxicu hasta la so conversión en documentu históricu.

Busca d’afinidaes formales y simbóliques con cascos d’otres zones

“Güei ye un día mui importante y feliz p’Asturies porque recuperamos un testimoniu de valor incalculable pa conocer meyor quiénes fuimos y cómo vivimos. L’estraordinariu trabayu del equipu del nuesu Muséu Arqueolóxicu permitiónos sumar a la so coleición dos pieces que representen un testimoniu únicu de la Edá del Fierro na Península Ibérica y n’Europa”, rescampló Piñán.

L’estudiu del xacimientu ribeseyanu apunta a que se trata d’un depósitu ritual nel interior d’una cueva con un usu ceremonial que se remonta a tiempos prehistóricos, pero que, en principio, paez nun tar venceyáu con prácuiques funeraries. L’Arqueolóxicu va coordinar l’estudiu históricu de les pieces atopaes que deberá interpretar el significáu del afayu nel contestu de la época castreña y l’hábitat fortificáu del oriente asturianu, y van esaminase cascos utilizaos n’otres zones del continente pa rastrexar posibles afinidaes formales y simbóliques dende Oriente Medio hasta l’Arcu Atlánticu.

Na semeya inferior, Piñán xunto a los cascos acompañada por Ángel Villa, arqueólogu coordinador del proyeutu; Pablo León, direutor xeneral de Cultura y Patrimoniu; Luis Fuentes, teniente alcalde de Ribeseya; y María Antonia Pedregal, direutora del Muséu Arqueolóxicu d'Asturies.

Contador Estadistiques