Doce empreses asturianes del sector eólico-marín participen na feria danesa Wind Europe Offshore 2019

Asturex, en collaboración col IDEPA, coordina l’asistencia d’una representación de doce empreses asturianes del sector eólico-marín en Copenhague na Wind Europe Offshore 2019. Esta feria ye l’alcuentru más importante del sector n’Europa, con más de 400 espositores y la participación de 9.000 profesionales de la industria.

La llista de firmes asturianes confórmenla Oxiplant, Mecainsa, Proinmec, Hierros Marcelino Franco, Bezzier, Astilleros Gondán y Ingoal. A elles súmense Pixelshub, Seerstems, Ingeniacity y Soar, toes elles empreses emerxentes que canalizaron la so participación col sofitu del Centru Européu d’Empreses y Innovación (CEEI), los puertos de Xixón y Avilés y el centru teunolóxicu Idonial.

Toes elles yá tán dando servicios y productos na cadena de suministru de la enerxía anovable marina y desenvolviendo actividaes tanto d’investigación, desarrollu y innovación como de fabricación de componentes, sobre manera nel ámbitu del ‘offshore’. Amás, na feria tamién participa con un puestu propiu la compañía Windar Renovables, referencia na fabricación y diseñu d’equipos.

El conseyeru d’Industria, Emplegu y Promoción Económica, Enrique Fernández, viaxó a Dinamarca dende Bruxeles p’amosar el sofitu del Gobiernu a les empreses participantes y tener delles xuntes de trabayu. Fernández ta acompañáu pola direutora xeneral d’Industria, Rosana Prada; la direutora xeneral del IDEPA, Eva Pando; la direutora d’Asturex, Teresa Vigón; y la conseyera económica y comercial de la Embaxada d’España en Dinamarca, Pilar Morán.

Fernández visitó’l puestu de les empreses asturianes y destacó les potencialidaes y especialización de la país nel ámbitu de la enerxía eólico ‘offshore’ y los materiales avanzaos. Estes capacidaes vense reforzaes, a xuiciu del conseyeru, por dos iniciatives impulsaes pol Gobiernu nel marcu de la collaboración público-privada: el Polu Industrial del Aceru y el Dixital Innovation Hub.

Sector protagonista nel procesu de transición enerxética

“La posición estratéxica de los puertos de Xixón y Avilés, como plataformes afayadices p’allugar operaciones de fabricación, montaxe y suministru de componentes y equipos, y la presencia tan importante n’Asturies d’empreses del metal, enerxía y naval conformen un texíu industrial con esperiencia y capacidaes materiales y humanes pa dar soluciones na cadena de suministru de la enerxía marino a nivel mundial”, resaltó’l. “Dende la Conseyería d’Industria caltenemos un apueste de presente y de futuru pola industria eólica ‘offshore’ n’Asturies como un sector llamáu a desempeñar un papel protagonista nel procesu de transición enerxética”, añadió.

La feria Wind Europe Offshore 2019 axunta dende’l martes, y hasta mañana, a más de 9.000 profesionales de la industria y 250 conferenciantes, y ye’l marcu de referencia sobre les últimes tendencies del sector. Asina, cuenta con más de 400 espositores, una zona de capacitación y habilidaes de seguridá de 200 metros cuadraos, una zona de mercaos globales y un parque d’innovación onde se dan a conocer les empreses nueves del sector.

Paralelamente a la esposición celébrense eventos de networking qu’ufierten munches oportunidaes comerciales a los asistentes. Nesti marcu les empreses asturianes van poder establecer contactos comerciales colos sos potenciales socios, veceros y collaboradores, y conocer les tendencies más relevantes de la industria.

Na semeya, delegación asturiana nel Wind Europe Offshore 2019.