Dixebra va recibir esti vienres el Premiu AMAS d’Honor 2012

La organización de los Premios AMAS anunció que Dixebra va recibir el títulu honoríficu del 2012 na gala del Teatru Filarmónica del vienres coincidiendo col so 25 aniversariu. La banda rock d’Avilés va compartir gallardón col Aquasella.
 
“El grupo Dixebra, con Xune Elipe a la cabeza, convirtióse tres 25 años d’esistencia nun grupu sólidu y con trayeutoria. Contestariu y siempre al llau de causes solidaries, les sos lletres nun dexen indiferente a nadie”, espresa la organización de los VII Premios Anuariu de la Música n'Asturies (AMAS), qu’esti vienres van entregase nun actu nel uviedín Teatru Filarmónica que va retresmitise en direutu peles onde de los 40 Principales Asturies y en diferíu pela TPA y Sol Música. Dixebra, que’l 30 de marzu va celebrar en Quattro (22.30 hores) el so vixésimoquintu aniversariu con un conciertu especial, comparte esti AMAS d’Honor col festival de música electrónica Aquasella, qu’esti añu cumple 15 ediciones celebrándose en Les Arriondes coincidiendo cola Fiesta de les Piragües.
 
Amás del Premiu AMAS d’Honor, el vienres van entregase nel Filarmónica otros 20 gallardones en delles categoríes a los ganadores de la votación popular celebrada per Internet. La entrada pa presenciar la gala, que va principiar a les 20.30 hores, ye de baldre previa retirada de la invitación nes llibreríes La Palma (Uviéu) y Paradiso (Xixón), y en Discos Elepé (Avilés). Tres esti eventu, va tener llugar un conciertu de Helltrip en La Antigua Estación, tamién con entrada gratuita.