Dixebra va grabar un directu pa celebrar el so XX aniversariu

El grupu asturianu de rock n'asturianu de más trayectoria, Dixebra, cumple l'añu qu'entra venti años d'existencia. Pa celebralo'l va editar un discu directu con DVD que se va grabar el próximu trés de xunu n'Avilés.

El seis de xineru de 1987 nacía n'Avilés Dixebra, la banda de rock combatible y n'asturianu qu'inda güei sigue siendo referente pa tol que quiera conocer la hestoria del rock n'Asturies. Dempués de casi venti años de música Dixebra suma 8 discos, milenta conciertos y incontables esperiencies, que'l grupu quier resumir el próximu
trés de xunu n'Avilés. Ello ye que Dixebra va facer un conciertu mui especial na Plaza'l Parche d'Avilés el trés de xunu, pa grabalu y editar l'añu qu'entra un DVD conmemorando los sos venti años de vida.


El cantante del grupu, Xune Elipe, comentó a Asturies.com dellos aspectos d'esti eventu, asegurando que "esti conciertu tenía que ser n'Avilés, porque son les cais d'esta ciudá les que nos vieron nacer como grupu, y amás pa nós ye tamién mui simbólicu y especial que'l conciertu vaya ser na plaza'l pueblu". En qué va consistir el conciertu, que va entamar a eso de les 22:30 hores, resúmelo Xune "nun repasu per tola nuesa discografía, dende los temes más "clásicos" del nuestru repertoriu hasta los más de recién, recuperarando dellos qu'hai cuantayá que nun se toquen y estrenando otros qu'enxamás se tocaron en direutu. Van ser cerca de dos hores de conciertu nes que van tar con nós unos cuantos amigos músicos pa reforzanos nesta ocasión" Ente estos amigos, Xune dio los nomes de Xosé Ambás, Dj Stilo, Dark la eMe, Rubén Bada "y dellos músicos más na sección de metales".

Como responsables de la grabación pal futuru DVD va tar xente cercano del grupu, y que cuenta col enfotu de la banda de va tiempu, asina de la parte sonora va encargáse Sergio Rodríguez y Kaki Arkarazo; el primeru bien conocíu na escena musical asturiana polos sos munchos trabayos n'estremaos estilos y responsable de Tutu Estudios, el segundu prestixosu productor musical vascu (Kortatu, Negu Gorriak, Nación Reixa, Amparanoia…); mientres que de la cuestión visual l'encargáu va ser el xoven realizador Guillermo Fernández, autor de los últimos
últimos
video-clips. de la banda. Nestos momentos el grupu ta rematando cuestiones d'atrezzo del
escenariu pa convertir esta nueche en daqué realmente especial, tanto
pola música como pol espectáculu que puede arrodiar a esta fiesta
de cumpleaños adelantada.